Режиссёр Зулфиқор Мусоқовнинг «Осмондаги болалар» фильмидаги Ҳамдам роли билан машҳурликка эришган актёр Музаффар Саъдуллаев «Дарё» интернет-нашрига эксклюзив интервью берди. Интервьюни журналист Феруз Муҳаммад ташкиллаштирди.

Музаффар Саъдуллаев суҳбат давомида «Осмондаги болалар» фильмига қандай келиб қолгани ва «Осмондаги болалар 3» фильми суратга олиниши мумкинлиги ҳақида гапирди.

‘Осмондаги болалар’ фильмидаги Ҳамдам образига кастинг жараёнлари ҳам қизиқ бўлган. Фильмда Алфия опа исмли иккинчи режиссёримиз бор эди. Шу аёл ‘Зулфиқор Мусоқов ишга тушди, мен сценарийни ўқиб чиқдим, сен шу фильмдаги Ҳамдам образига жуда ҳам мос тушасан, у ҳам оддий ўзбек йигити, кастинг топшир, мен Зулфиқорга сен ҳақингда айтаман’, деганди. Мен ‘йўқ, бу жамоада маъмур бўлиб ишлайвераман’, деганман.

Кастинг жараёнлари бошланганидан сўнг, ҳар бир образ учун, адашмасам 300 ва ундан ортиқ йигитлар келган, қизлар роли учун ҳам худди шундай бўлган. Фото синовлар тугагач, видео синовлар бошланган. Ўша вақтда бир эпизодни беришди, ўқиб, айтганларидай қилиб бердим. Маълум бир вақт ўтгандан сўнг, Ҳамдам ролига тасдиқландинг дейишди.

Орадан бироз вақт ўтгандан сўнг, бу ролга мендан бошқа ҳам бир бола кастингдан ўтганини эшитдим. У бола қандайдир оилавий бир шароитданми ёки кўчада жанжаллашганми, билмадим, хуллас бурни синган дейишди. Шундан сўнг ‘Осмондаги болалар’ фильмидаги Ҳамдам ролига мен ўтиб кетган эканман.

Адашмасам ўтган йилнинг ёз-куз ойларида Зулфиқор Мусоқов ‘Осмондаги болалар 3’ фильмининг сценарийсини ёзяпман деган эдилар.

Музаффар Саъдуллаев, актёр, «Инсон» киностудияси раҳбари

«Осмондаги болалар 3» фильми суратга олиниши ҳақидаги маълумотга янада ойдинлик киритиш мақсадида фильм режиссёри Зулфиқор Мусоқовга боғланиб, улардан қуйидаги фикрларни олдик.

‘Осмондаги болалар 3’ фильмини суратга олиш режамизда бор эди.‘Фильмни суратга олин’, деяётган ҳомийлар ҳам топилганди. Кейин бошқа фильмлар режалаштирилди ва бу фильм тўхтаб қолди. Балки, кун келиб фильмни суратга олишга ҳомийлар топилса, ‘Осмондаги болалар 3’ фильмини суратга олишимиз мумкин.

Зулфиқор Мусоқов, режиссёр, Ўзбекистонда хизмат кўрсатган санъат арбоби

Маълумот учун, «Осмондаги болалар» фильми режиссёр Зулфиқор Мусоқов томонидан 2002 йилда, «Осмондаги болалар 2» фильми эса 2003 йилда суратга олинган.