Burni singan “Hamdam”. “Osmondagi bolalar” filmidagi Hamdam kastingdagi qiziq holat va “Osmondagi bolalar 3”ning suratga olinishi haqida (video)

Rejissor Zulfiqor Musoqovning “Osmondagi bolalar” filmidagi Hamdam roli bilan mashhurlikka erishgan aktyor Muzaffar Sa’dullayev “Daryo” internet-nashriga eksklyuziv intervyu berdi. Intervyuni jurnalist Feruz Muhammad tashkillashtirdi.

Muzaffar Sa’dullayev suhbat davomida “Osmondagi bolalar” filmiga qanday kelib qolgani va “Osmondagi bolalar 3” filmi suratga olinishi mumkinligi haqida gapirdi.

‘Osmondagi bolalar’ filmidagi Hamdam obraziga kasting jarayonlari ham qiziq bo‘lgan. Filmda Alfiya opa ismli ikkinchi rejissorimiz bor edi. Shu ayol ‘Zulfiqor Musoqov ishga tushdi, men ssenariyni o‘qib chiqdim, sen shu filmdagi Hamdam obraziga juda ham mos tushasan, u ham oddiy o‘zbek yigiti, kasting topshir, men Zulfiqorga sen haqingda aytaman’, degandi. Men ‘yo‘q, bu jamoada ma’mur bo‘lib ishlayveraman’, deganman.

Kasting jarayonlari boshlanganidan so‘ng, har bir obraz uchun, adashmasam 300 va undan ortiq yigitlar kelgan, qizlar roli uchun ham xuddi shunday bo‘lgan. Foto sinovlar tugagach, video sinovlar boshlangan. O‘sha vaqtda bir epizodni berishdi, o‘qib, aytganlariday qilib berdim. Ma’lum bir vaqt o‘tgandan so‘ng, Hamdam roliga tasdiqlanding deyishdi.

Oradan biroz vaqt o‘tgandan so‘ng, bu rolga mendan boshqa ham bir bola kastingdan o‘tganini eshitdim. U bola qandaydir oilaviy bir sharoitdanmi yoki ko‘chada janjallashganmi, bilmadim, xullas burni singan deyishdi. Shundan so‘ng ‘Osmondagi bolalar’ filmidagi Hamdam roliga men o‘tib ketgan ekanman.

Adashmasam o‘tgan yilning yoz-kuz oylarida Zulfiqor Musoqov ‘Osmondagi bolalar 3’ filmining ssenariysini yozyapman degan edilar.

Muzaffar Sa’dullayev, aktyor, “Inson” kinostudiyasi rahbari

‘Osmondagi bolalar 3’ filmini suratga olish rejamizda bor edi.‘Filmni suratga oling’, deyayotgan homiylar ham topilgandi. Keyin boshqa filmlar rejalashtirildi va bu film to‘xtab qoldi. Balki, kun kelib filmni suratga olishga homiylar topilsa, ‘Osmondagi bolalar 3’ filmini suratga olishimiz mumkin.

Zulfiqor Musoqov, rejissor, O‘zbekistonda xizmat ko‘rsatgan san’at arbobi