Ўзбекистон Энергетика вазирлиги, шунингдек, «Иссиқлик электр тармоқлари» ва «Тахиатош ИЭС» АЖ томонидан мамлакат ва хорижий ОАВ вакилларини Ўзбекистоннинг электр энергетика соҳаси фаолияти билан таништириш мақсадида пресс-тур ташкил қилинди. Журналистлар учун пресс-тур Қорақалпоғистон Республикасида, Нукус шаҳридан 18 километр узоқликда ўтказилди. Пресс-турда «Дарё» мухбири ҳам иштирок этди.
Журналистлар ёқилғи-энергетика тармоғи объектларида бўлди, уларнинг биринчиси Қорақалпоғистон Республикаси Тахиатош шаҳрида, Амударё бўйида жойлашган Тахиатош ГЭС эди.
«Тахиатош ИЭС» АЖ «Иссиқлик электр тармоқлари» АЖ таркибига киради. Қуввати 28 мегаватт бўлган ИЭС қурилиши 1961 йилда амалга оширилган.
210 мегаваттли сўнгги олтинчи навбатининг қурилиши 1990 йилда якунланган. Ҳозирги пайтда техник ва маънавий эскирган ускуналар фойдаланишдан чиқарилган ва демонтаж қилинган. Асосий ёқилғиси Бухоро конидан чиқадиган табиий газ, захира ёқилғиси — мазут ҳисобланади.
2015—2017 йилларда Ўзбекистон Президентининг қарорларига асосан Тахиатош ИЭСда қуввати 230—280 МВт га тенг иккита буғ-газ қурилмасининг қурилиши бошланган. Лойиҳанинг амалга оширилиши муддати — 2015—2021 йиллар.
Лойиҳа ўз ичига иккита буғ газ турбиналари (БГТ) қурилиши, эски ва самарасиз энергоблокларни фойдаланишдан чиқариш, энергия самарадорликни ошириш ҳамда Қорақалпоғистон Республикаси ва Хоразм вилоятида электр узатиш ҳажмини ошириш тадбирларини қамраб олади.
Тахиатош ИЭС Қорақалпоғистон Республикаси ва Хоразм вилоятида асосий электр манбаи ҳисобланади. 2012 йилда ушбу ҳудудларда энг юқори юклама 466 Мегаватт (МВт) бўлгани ҳолда электр энергияси истеъмоли 2 293 миллион киловатт/соатни ташкил этган. 2020 йилга келиб энг юқори юкламаси 620 Мегаватт бўлгани ҳолда электр энергияси истеъмоли 3 620 миллион киловатт/соатдан ортиши кутилмоқда.
Ишончли электр таъминоти учун, Ўзбекистон ҳукумати ва «Ўзбекэнерго» ДАЖ ушбу лойиҳани устувор, деб топди, ҳар бири иккита 230-280 Мегаватт қувватга эга буғ-газ ускунасини қуриш, мавжуд энергоблокларни демонтаж қилишга қарор қилди.
Энергия самарали блокларни қуришга бундай ёндашув ва айни пайтда эски ва кам самарали қурилмаларнинг чиқарилишини модернизациялаш бўйича биринчи интеграцияланган модел бўлади ва энергетика секторини реструктуризация қилишга йўл очиб беради.
Лойиҳанинг умумий қиймати 678,2 миллион долларни ташкил этади, шу жумладан:
- ОТБ нинг қарз маблағлари – 300 миллион доллар;
- ЎТТЖ нинг кредит маблағлари – 230,7 миллион доллар;
- Ўз маблағлари – 27,3 миллион доллар;
- Ўзбекистон Республикаси улуши (берилган солиқ ва божхона имтиёзлари шаклида) - 120,2 миллион доллар;
қуввати 230—280 Мегаваттга тенг иккита БГҚ ишга туширилгач, станциянинг техник-иқтисодий кўрсаткичлари қуйидагиларни ташкил этади:
- станциянинг белгиланган қуввати 560 Мегаваттни ташкил этади;
- станциянинг йиллик энергия ишлаб чиқариш қуввати 3,0 миллиард киловатт/соатдан тўрт миллиард киловатт/соатга ошади;
- сув ресурсларига бўлган йиллик талаб 293 миллион метр кубдан камаяди ва йилига 159 миллион метр кубни ташкил этади.
- йилига 488,6 миллион метр куб табиий газни тежайди.
- ИЭС томонидан атмосферага чиқиндилар чиқарилиши 3,2 баравар камаяди.
- ишчи ва хизматчиларнинг сони – 97 киши.
2018 йилда Тахиатош ИЭС га ГЕ газ турбиналари ва генераторлар етказиб берилди. Ускуналар Влиссинген (Нидерландия) портига етказилди, у ердан Ўрта ер денгизи, Қора денгиз ва Азов денгизлари орқали олиб ўтилган, сўнгра Волга-Дон канали орқали Каспий денгизига, Қозоғистондаги Куриқ портига, ундан сўнг юк автотранспорт ёрдамида Ўзбекистондаги қурилиш майдончасига етказилган.
БГУ нинг биринчи навбатининг ишга туширилиши 2010 йилга мўлжалланган.
Изоҳ (0)