Ишонч суиистеъмол қилинди
Барчамизга маълумки, 2017—2021 йилларда Ўзбекистон Республикасини ривожлантириш бўйича ҳаракатлар стратегиясининг бешта устувор йўналишларидан бири саналган ижтимоий соҳани ривожлантиришга йўналтирилган, муҳандислик–коммуникация ва ижтимоий инфратузилмаларни ривожлантириш ҳамда модернизация қилиш бўйича мақсадли дастурларни амалга ошириш борасида «Фарғона ҳудудий электр тармоқлари корхонаси» АЖ томонидан иқтисодиёт тармоқларига сифатли ҳамда узлуксиз электр энергияси етказиб бериш, тадбиркорлик фаолияти учун янада қулай шарт-шароит яратиш, қолаверса, инвестицион муҳитни барқарорлаштириш юзасидан модернизация ва реконструкция ишлари жадал олиб борилмоқда.
Мазкур ишларни амалга оширишда соҳа мутахассислари тун-у кун тинимсиз меҳнат қилаётган бир паллада, ўз манфаати йўлида раҳбарият томонидан ишониб топширилган мансабни суиистеъмол қиладиганлар ҳам учраб турибди.Юқоридаги жумланинг тасдиғи шуки, жорий йилнинг 4 май куни «Фарғона ҳудудий электр тармоқлари корхонаси» АЖ марказий омборидан темир конструкцияли сув сақлаш иншооти айнан шу жамиятнинг хўжалик қўриқлаш бўлими бошлиғи ҳамда унинг ходимлари томонидан ўзбошимчалик билан олиб чиқиб кетилганлиги ҳолати аниқланган.
Ҳолат юзасидан ўтказилган ўрганишлар давомида аниқланишича, «Фарғона ҳудудий электр тармоқлари корхонаси» АЖ хўжалик қўриқлаш бўлими бошлиғи қўл остидаги ходимлари билан яширин равишда марказий омбор ҳудудига киришиб, видеокузатув камераларини қасддан ўчириб, баландлиги 15 метр бўлган темир конструкцияли сув сақлаш иншоотини қисмларга ажратиб, хўжалик қўриқлаш бўлими қоровулининг Москвич—412 русумли (фургон) автотранспорт воситасига юклаб, омбор ҳудудидан олиб чиқиб, Фарғона шаҳрининг Қиргули мавзесида жойлашган «Темир бозори»да номаълум шахсларга сотиб юборишган.
Бундан ташқари, ўрганиш давомида шу йилнинг 13 апрель куни жамиятнинг марказий омборидан 11 турдаги товар–моддий бойликлар ҳеч қандай ҳужжатларсиз жамиятнинг яна ўша хўжалик қўриқлаш бўлими бошлиғи ҳамда унинг қўл остидаги ходимлари томонидан номаълум шахсга тегишли бўлган юк машинасида олиб чиқиб кетилганлиги аниқланган.Аудит ташкилотининг хулосасига кўра, юқоридаги талон–торожлик натижасида жамиятга кўп миқдорда зарар етказилган.
Қизиқ жиҳати шундаки, жамиятнинг хўжалик қўриқлаш бўлими бошлиғининг зиммасига жамиятга тегишли бўлган объектларнинг мустаҳкам қўриқланишини таъминлаш, жамият мулкининг талон–торож қилинишини олдини олиш ва унга йўл қўймаслик чораларини кўриш каби вазифалар ишонч билдириб топширилган бўлсада, қўл остидаги ходимларини эгри йўлга бошлаб, ўз манфаатлари йўлида жамият мулкини талон–торож қилган.
Ҳозирда юқоридаги ҳолат юзасидан қонуний чора кўриш учун Фарғона шаҳар прокуратураси томонидан жамиятнинг хўжалик қўриқлаш бўлими бошлиғи ва бошқаларга нисбатан Ўзбекистон Республикаси Жиноят Кодексининг 167–моддаси 3–қисми «а» банди билан жиноят иши қўзғатилиб, тергов ҳаракатлари олиб борилмоқда.
