Ахборот ва оммавий коммуникациялар агентлиги раҳбари Комил Алламжонов агентлик тасарруфидаги «Ўзбекистон» нашриёт-матбаа ижодий уйи ходимлари истиқомат қилаётган 17-Б уйда яшаётган одамлар билан мулоқот қилиб, уларнинг яшаш тарзи билан танишди. Бу ҳақда Комил Алламжонов Facebook’даги саҳифасида хабар берди.
Қайд этилишича, 48 та хонадондан иборат бинода босмахонада йиллар давомида фаолият юритаётган матбаачи, муқоваловчи, сантехник, механик каби оддий ходимлари оиласи, фарзандлари билан истиқомат қилади. «Мазкур корхонада узоқ йиллардан буён меҳнат қилиб, ўз тажрибасини ёш авлодга ўргатиб келаётган фахрийларимиз ҳам бор. Ҳатто бир ходимимиз шу даргоҳда фаолият бошлаганидан буён фарзанд катта қилиб, яқинда қиз чиқараётган экан. Бутун жамоа оилавий аҳил ва борди-келди қилар экан. Уларни ҳозирга қадар битта дард безовта қилиб келар эди — ушбу хонадонлар уларга қарашли эмас эди. Уй ўзингники бўлмаганидан кейин халоват топмай, хавотир ва ҳадик ичида яшашни тассавур қилиб кўринг. Айтиш керакки, мазкур уй 1988 йилда фойдаланишга топширилган. Одамлар ўттиз йилдан ортиқ вақт мобайнида шу уй ўз мулкига айланишини орзу қилиб, кутиб яшади», — деб ёзади у.
Агентлик раҳбарининг айтишича, Қурбон ҳайити байрами арафасида ушбу 48 та хонадоннинг кадастр ҳужжатлари тайёрланиб, ишчи ходимлар номига расмийлаштириб берилган.
Комил Алламжоновнинг қайд этишича, матбаачилар Президент сиёсати туфайли уйли бўлди. Чунки давлат раҳбарининг парламентга мурожаатида бюджет соҳаси ходимларини, кам таъминланган оилаларни уй-жой муаммоси кўпдан буён қийнаб келиши қайд этилган эди. «Бу оғир ижтимоий муаммога биз деярли эътибор бермай келганимиз ҳам бор гап», — деган эди Президент.
Изоҳ (0)