Аввал хабар берганимиздек, Ўзбекистон делегацияси Будапешт шаҳрида Марказий ва Шарқий Европа мамлакатларининг онкология соҳасида ҳамкорлик бўйича халқаро конфересияда иштирок этмоқда. Эслатиб ўтамиз, ушбу тадбир ташкилотчилари – Жаҳон соғлиқни сақлаш ташкилоти, Венгрия ҳукумати ҳамда Венгрия инсон ресурслари вазирлиги ҳисобланади. Бу ҳақда Соғлиқни сақлаш вазирлиги «Дарё»га хабар берди.
Жаҳон соғлиқни сақлаш ташкилотининг Европа минтақавий бюросига аъзо 53 давлат орасида Ўзбекистон делегацияси мамлакатда онкологик хизмат ҳолати ва ривожлантириш истиқболлари ҳақида тақдимот ўтказди. Республика ихтисослашган Онкология ва радиология илмий-амалий тиббиёт маркази директори Мирзағолиб Тиллашайхов ўз нутқида таъкидлаб ўтганидек, жаҳонда йилига 15 миллионга яқин инсон саратон билан касаллангани аниқланмоқда, мамлакатда эса бугун 96 мингдан зиёд беморлар онкологик хасталик билан рўйҳатга олинган. Мазкур масаланинг долзарблигини ҳисобга олган ҳолда, Ўзбекистон Президентининг 2017 йил 4 апрелда «2017 — 2021 йилларда Ўзбекистон Республикасида онкология хизматини янада ривожлантириш ва аҳолига онкологик ёрдам кўрсатишни такомиллаштириш чора-тадбирлари тўғрисида»ги қарори қабул қилинди. Шу асосда мамлакатнинг барча ҳудудларида Республика ихтисослашган Онкология ва радиология илмий-амалий тиббиёт маркази филиаллари ташкил этилди. Онкологик касалликлар диагностикаси ва даволашнинг замонавий стандартлари ишлаб чиқилиб, клиник амалиётга жорий қилинди ҳамда вертикал онкология хизмати яратилди.
Эътиборли жиҳати, сўнгги йилларда ўзбекистонлик онкологларнинг фаол саъй-ҳаракатлари туфайли соҳада энг нуфузли саналган ESMO, ASCО каби халқаро ташкилотларга аъзо бўлди. 2017-2018 йилларда 100 дан зиёд мутахассислар Россия, АҚШ, Корея, Туркия, Польша, Ҳиндистон, Белорус каби мамлакатларнинг нуфузли клиникаларида давлат ҳисобидан малака оширди. Сўнгги икки йил ичида кимёвий препаратлар билан таъминлаш ҳам сезиларли даражада яхшиланиб, 85—90 фоизгача етди. Марказ томонидан видео-лапароскопик жарроҳлик мажмуаси сотиб олингандан сўнг, республикада биринчи марта видео-лапароскопик нефректомия, тромбектомияли нефректомия ва буйрак резексияси каби юқори технологияли операциялар ўтказилади.
Жаҳон соғлиқни сақлаш ташкилоти вакили Лиде Лазер Ўзбекистоннинг барқарор ривожланиш мақсадларига эришиш бўйича мажбуриятларни ва соғлиқни сақлаш хизмати билан бутун мамлакатни қамраб олиш йўналишидаги вазифаларни бажаришдаги ютуқларини юқори баҳолади.
«Жаҳон соғлиқни сақлаш ташкилоти Ўзбекистон соғлиқни сақлаш тизимида амалга оширилаётган тизимли ислоҳотларни тўлиқ қўллаб-қувватлайди. Олиб борилаётган ушбу ўзгаришлар кўплаб мамлакатлар учун намуна бўла олади, – деди, жумладан, Лиде Лазер. – 2019 — 2025 йилларда Ўзбекистон Республикаси соғлиқни сақлаш тизимини ривожлантириш концепциясини ишлаб чиқишда ЖССТ мутахассисларининг тавсиялари эътиборга олиниб, қабул қилиниши чиндан ҳам тарихий воқеадир. Ишончим комилки, тизимни ривожлантириш учун бутунлай янги концепцияни жорий этилиши аҳоли саломатлигини самарали ҳимоя қилишда асос бўлиб хизмат қилади. Зеро, тиббиётни ислоҳ қилишнинг мазкур етти йиллик ривожланиш концепциясини амалга ошириш сифатли тиббий хизматлар кўламини янада кенгайтириш, Ўзбекистон аҳолисининг саломатлиги ва фаровонлигини оширишда муҳим аҳамиятга эга».
Конференсия якунида иштирокчилар Марказий ва Шарқий Европа ҳамда Марказий Осиёда онкологик таълим, илмий тадқиқотлар ва ривожланиш соҳасида ҳамкорлик тўғрисида декларацияни имзолади.
Изоҳ (0)