Akfa Lighting компанияси автомобиль чироқларини ишлаб чиқараётганини рад этди. Аммо биринчи манба ўз хабарига ҳалигача раддия бермади

21 май куни «Дарё» интернет нашри Ўзбекистон Миллий ахборот агентлигининг «Автомобиль чироқлари савдоси авжида: Кимлар фойда кўзлаган?» сарлавҳали мақоласини чоп этди.

Ушбу мақолада муаллиф Akfa Lighting компанияси ҳам автомобиль чироқларини эҳтиёт қисмлари бозорига олиб киргани, бироқ улар янги бўлгани учун чироқларни бозорда учратмаганини ёзган.

Akfa Lighting компанияси «Дарё» интернет нашрига хат йўллаб, ушбу маълумот асоссиз эканлигини, компания автомобиль чироқларини ишлаб чиқармаётгани ва келгусида ҳам режалаштирилмаётганини маълум қилди. Бироқ, «Дарё» да чоп этилган хабарга асос бўлган Ўзбекистон миллий ахборот агентлигидаги мақола ҳалигача агентлик сайтида турибди. Шунингдек, агентлик ўз мақоласига раддия ҳам эълон қилмади.