Тошкент шаҳар ИИББ ижтимоий тармоқлардаги Жамоатчилик назорати гуруҳида фойдаланувчи Ольга Непомняшчая томонидан 21 май куни қолдирилган постни ўрганиб чиқди. Бу ҳақда Тошкент шаҳар ИИББ хабар берди.
«Биринчи марта ‘Бек Барака’ бозорига бордим. Мен тушишим керак бўлган бекатда автобусдаги ҳамма йўловчилар тушди. Икки йўл ўртасига ўрнатилган панжаранинг тешиги автобус бекати вазифасини ўташини кўриб ҳайрон қолдим. ‘Бизнинu’ йўловчилар ундан ўтаётганда, бошқа йўналишли такси ва автобуслардан ҳам йўловчилар туша бошлади. Қизиқ, бу табиий ҳолми ёки мен экстремал ҳолатга дуч келдимми?»
Фойдаланувчи ҳолат юзасидан чора кўрилишини ва йўловчиларнинг ҳаракатини тартибга солишни сўраган.
Гап шундаки, автобус ва йўналишли такси ҳайдовчилари йўловчиларни бекатда эмас, балки йўл юзасида туширади. Натижада одамлар бозорга киргунча панжарадан ўтиб олиб, йўлнинг иккинчи қисмини ҳам босиб ўтади. Бунинг ҳаммаси ҳам жамоат транспорти ҳайдовчилари, ҳам нотўғри жойда йўлни кесиб ўтаётган йўловчилар томонидан йўл қўйилаётган хатолик ҳисобланади.
Йўл ҳаракати хавфсизлигини таъминлаш ва юзага келиши мумкин бўлган бахтсиз ҳодисаларнинг олдини олиш мақсадида, 22 май куни ИИББ ходимлари уй-жой коммунал хўжалиги ходимлари билан биргаликда панжарадаги барча бўшлиқларни ёпиб чиқди. Шунингдек, йўловчиларни тушириш қоидаларини бузган ҳайдовчиларга маъмурий чоралар қўлланилди.
Изоҳ (0)