АҚШ президенти Дональд Трамп полиция ходимларини ўлдирган барча жиноятчиларни қатл қилишни таклиф этди. ForumDaily’нинг ёзишича, президент бу ҳақда хизмат вазифаларини бажаришда ҳалок бўлган полиция ходимларини хотирлаш маросимида айтиб ўтган.
Фото: Depositphotos
Трампнинг таъкидлашича, полиция ходимларига ҳужум қилиш ҳолатлари тўхташи керак. Трамп жиноятчиларни «зудлик билан» ўлим жазосига ҳукм қилишни таклиф қилган.
«Полиция офицерини ўлдирган жиноятчилар суд томонидан зудлик билан ўлим жазосига ҳукм қилиниши керак, суд жараёни ҳам тезда ўтказилиши лозим», — деб таъкидлаган Трамп.
Ҳуқуқни муҳофаза қилиш органлари мемориал фонди маълумотларига кўра, АҚШда 2019 йилнинг 1 январидан 15 майигача хизмат вазифаларини бажараётган 43 нафар полиция офицери ҳалок бўлган. Бу 2018 йилнинг худди шу давридаги кўрсаткичларга нисбатан 32 фоизга кам.
