2019 йил 10 март куни соат 03:30 атрофида Наманган вилояти Норин тумани, Яйдоқ маҳалласида яшовчи фуқаронинг хонадонига 3 нафар ниқоб таққан номаълум шахс бостириб кирган. Бу ҳақда «Дарё»га вилоят ИИБ матбуот хизмати маълум қилди.
Жиноятчилар хонадон эгасининг онаси, турмуш ўртоғи ҳамда уйга меҳмонга келган холасига ҳужум қилиб, пул, қимматбаҳо буюм ва хонадондаги сейф калитини беришни талаб қилади, қуроллари билан уларга жароҳат етказади.
Уй эгасининг турмуш ўртоғи деразадан кўчага қочиб чиқиб, қўни-қўшниларни чақирганлиги сабабли номаълум шахслар воқеа жойидан қочиб кетган.
Ҳодиса жойидан таёқ, пичоқ, қайчи, чарм қўлқоп, тиббиёт қўлқопи, қора матоли ниқоблар, спорт сумкаси, ёғочдан ясалган бита, отвёртка, бармоқ излари ва қонга ўхшаш доғлардан намуналар далилий ашё сифатида олинган.
Ушбу ҳолат бўйича Норин туман прокуратураси томонидан жиноят иши қўзғатилган.
Наманган вилоят ИИБ ЖҚБ тезкор вакиллари томонидан олиб борилган тезкор-қидирув ва суриштирув харакатлари натижасида ушбу жиноятни Андижон шаҳрида яшовчи Қ. Э. ва Қ. Д. ҳамда Андижон туманида яшовчи О. О. содир этганликлари аниқланган. Айни пайтда ушбу шахслар қўлга олинган.
Изоҳ (0)