13 февраль куни Ахборот ва оммавий коммуникациялар агентлиги пресс-холлида «Малакали кадрларнинг мамлакат тараққиётидаги ўрни» мавзусида матбуот анжумани бўлиб ўтди. Бу ҳақда «Дарё» мухбири Севара Нишонова хабар берди.
Тадбирда Олий ва ўрта махсус таълим вазирлиги, Давлат бошқаруви академияси, «Эл-юрт умиди» жамғармаси раҳбарлари ҳисобот берди, шунингдек республикада малакали кадрларга бўлган эҳтиёж, замонавий билимга эга бўлган кадрларни тайёрлашда халқаро ва миллий тажрибанинг ўрни юзасидан фикр-мулоҳазалар билдирилди.
Президент ҳузуридаги давлат бошқарув академияси олдидаги вазифаларни қай даражада бажаряпти?
Ўзбекистон Президентининг 2017 йил 8 августдаги «Ўзбекистон Республикаси Президенти ҳузуридаги давлат бошқаруви академиясида бошқарув кадрларини тайёрлаш, қайта тайёрлаш ва уларнинг малакасини оширишнинг самарали тизимини янада ривожлантириш чора-тадбирлари тўғрисида»ги ПF-5139-сон фармонига мувофиқ, Давлат бошқаруви академияси бошқарув кадрларини тайёрлаш, қайта тайёрлаш ва малакасини ошириш, шунингдек, давлат ва жамият бошқаруви соҳасида фундаментал ҳамда амалий-илмий тадқиқотлар олиб борувчи олий таълим муассасаси ҳисобланади.
Қайд этилишича, Президент ҳузуридаги Давлат бошқаруви академияси томонидан 2018—2019-ўқув йилининг биринчи ярмида қатор ишлар амалга оширилди. Хусусан:
Бошқарув кадрларини тайёрлаш (магистратура) йўналиши бўйича академияда 119 нафар тингловчи таҳсил олмоқда;
Бошқарув кадрларини тайёрлаш (магистратура) бўйича ишлаб чиқаришдан ажралмаган ҳолда 60 нафар, ишлаб чиқаришдан ажралган ҳолда 30 нафар тингловчи таҳсил олмоқда, 30 нафар тингловчи мазкур йўналиш бўйича ўқишни муваффақиятли тамомлади;
Бошқарув кадрлари малакасини ошириш академия ва унинг 5 та ҳудудий филиали (Урганч, Қарши, Самарқанд, Гулистон, Фарғона)да амалга оширилмоқда. Ўтган давр мобайнида 3 мингдан зиёд раҳбар-кадрлар малака ошириш курсларида таҳсил олди;
Бугунги кунда 29 нафар профессор-ўқитувчи фаолият кўрсатмоқда, улардан 10 нафари фан доктори, 11 нафари фан номзоди бўлиб, академия илмий салоҳияти 72 фоизни ташкил этади.
Академияда иккита илмий даражалар берувчи илмий кенгаш (ҳуқуқ, социология) фаолият кўрсатмоқда.
Академия қошида Ёшлар муаммоларини ўрганиш ва истиқболли кадрлар тайёрлаш институти фаолиайт кўрсатмоқда. 2018—2019-ўқув йилининг биринчи ярим йиллиги ҳолатига кўра қайта тайёрлаш ўқув курсларида 47 нафар тингловчи, малака ошириш ўқув курсларида 137 нафар тингловчи таҳсил олди.
Олий ва ўрта махсус таълим соҳасида ўтган давр мобайнида қандай ишлар амалга оширилди?
Бугунги кунда республикада 96 та олий таълим муассасаси фаолият кўрсатади. Шу жумладан, республикада ўрнатилган тартибда 13 та хорижий олий таълим муассасаси филиали мавжуд.
Ўзбекистонда олий таълим олишга бўлган эҳтиёжнинг катталиги ҳамда ишлаб чиқаришдан ажралмаган ҳолда олий таълим олиш имкониятини яратиш мақсадида 2018—2019-ўқув йилидан бошлаб 52 та олий таълим муассасасида сиртқи, 9 та олий таълим муассасасида кечки таълим шакли жорий этилди.
Биргина 2018—2019-ўқув йилидан бошлаб 16 та олий таълим муассасасида етакчи хорижий олий таълим муассасалари билан ҳамкорликда 33 та таълим йўналиши ва 14 та мутахассислик бўйича қўшма таълим дастури асосида кадрлар тайёрлаш йўлга қўйилди.
Олий ва ўрта махсус таълим вазирлиги тизимига ёшларни кенгроқ жалб қилиш мақсадида ҳар ярим йилда бир марта Ўзбекистон Ёшлар иттифоқининг тегишли кенгашларига ташкилот ва олий таълим муассасасидаги масъул ва раҳбар лавозимларга бўлган реал эҳтиёждан келиб чиқиб, буюртма билан мурожаат этиш ҳамда иттифоқ томонидан тавсия этилган номзодларни кадрлар захирасига киритиш, уларнинг тегишли лавозимларда фаолият юритишини таъминлаш тизимини жорий этган.
Изоҳ (0)