Самарқандда бир неча фуқаронинг мол ва қўйларини фирибгарлик билан қўлга киритган фуқаро 5 йилга қамалди

Жиноят ишлари бўйича Самарқанд туман судида муқаддам Ўзбекистон Республикаси Жиноят Кодексининг 168-моддаси (Фирибгарлик) 2-қисми билан уч маротаба судланган Маъруфжон Мардиевнинг жинояти юзасидан суд иши бўлиб ўтди. Бу ҳақида «Дарё» мухбири Фарҳод Норбўтаев хабар бермоқда.

Судья Д.Нуралиев раислигида ўтган суд мажлисида илгари фирибгарлик жинояти содир этганлиги юзасидан суд томонидан тайинланган жазони ўтаб келиб, хавфли рецидивист шахс бўлган Маъруфжон Мардиев содир этган жинояти атрофлича ўрганиб чиқилди.

Хусусан, Мардиев фирибгарлик йўли билан ўзганинг мулкини қўлга киритиш мақсадида 2018 йилнинг 7 май куни Самарқанд туман «Ўзбеккенти» маҳалласида яшовчи Н.Т.га тегишли бозор баҳоси 4 миллион сўм бўлган сигирини қимматроқ нархда сотиб беришини айтиб, Н.Т.га олдиндан 20 минг сўм берган. Маъруф Мардиев ушбу бир бош сигирни бозорга олиб чиқиб, терговда аниқлашнинг имкони бўлмаган номаълум шахсларга сотиб юборган.

Бундан ташқари, Маъруфжон Мардиев такроран фирибгарлик йўли билан 2018 йилнинг 25 август куни Самарқанд шаҳар «Ипак йўли» маҳалласида яшовчи Р.Ҳ. исмли аёлнинг ишончига кириб, унинг икки бош қорамолини сотиб келишни билдирган. Аёлга тегишли бўлган баҳоси 4 100 000 миллион сўмлик икки бош қорамолини 3 600 000 сўмга сотиб юборган. Судланувчи Мардиев Р.Ҳ.нинг ишончига кириш мақсадида дастлаб унга пулларни берган. Бироқ ушбу пулларга Жомбой туманидан қорамол олиб, уларни сотиб пулини олиб келиб беришни ваъда қилиб, аёлдан 3 600 000 сўм миқдоридаги пулларни фирибгарлик йўли билан қўлга киритиб, пулларни ўз эҳтиёжлари учун сарфлаб юборган.

Шунингдек, Маъруфжон Мардиев ўзининг жиноий ҳаракатларини давом эттириб, 2018 йил 27 июль куни Самарқанд шаҳар Кимёгарлар қўрғонида Оқдарё тумани «Бобур» маҳалласи «Жоғолтой» қишлоғида яшовчи фуқаро Ҳ.И.нинг ишончига кириб, унга тегишли бўлган баҳоси 2 200 000 сўмлик 2 бош қўйини олиб кетиб, уларнинг пулларини бир соатда етказиб бериши ҳақида ваъда қилиб, унинг мулкини фирибгарлик йўли билан қўлга киритган.

Суд мажлисида судланувчи Маъруфжон Мардиев ўз айбига тўлиқ иқрорлик билдирди.

Суд ҳукмига кўра, Маъруфжон Мардиев Ўзбекистон Жиноят Кодексининг 168-моддаси 3-қисми «б» бандида (такроран ёки хавфли рецидивист томонидан содир этилган фирибгарлик) назарда тутилган жиноятларни содир этганликда айбли деб топилиб 5 йил 1 ой озодликдан маҳрум қилиш жазоси тайинланди.

Шунингдек, Маъруф Мардиевдан жабрланувчи Ҳ.И. фойдасига 2 100 000 сўм, жабрланувчи Р.Х. фойдасига 3 700 000 сўм, жабрланувчи Н.Т. фойдасига 300 000 сўм моддий зарар ундирилиши белгиланди.