13-fevral kuni Axborot va ommaviy kommunikatsiyalar agentligi press-xollida “Malakali kadrlarning mamlakat taraqqiyotidagi o‘rni” mavzusida matbuot anjumani bo‘lib o‘tdi. Bu haqda “Daryo” muxbiri Sevara Nishonova xabar berdi.
Tadbirda Oliy va o‘rta maxsus ta’lim vazirligi, Davlat boshqaruvi akademiyasi, “El-yurt umidi” jamg‘armasi rahbarlari hisobot berdi, shuningdek respublikada malakali kadrlarga bo‘lgan ehtiyoj, zamonaviy bilimga ega bo‘lgan kadrlarni tayyorlashda xalqaro va milliy tajribaning o‘rni yuzasidan fikr-mulohazalar bildirildi.
Prezident huzuridagi davlat boshqaruv akademiyasi oldidagi vazifalarni qay darajada bajaryapti?
O‘zbekiston Prezidentining 2017-yil 8-avgustdagi “O‘zbekiston Respublikasi Prezidenti huzuridagi davlat boshqaruvi akademiyasida boshqaruv kadrlarini tayyorlash, qayta tayyorlash va ularning malakasini oshirishning samarali tizimini yanada rivojlantirish chora-tadbirlari to‘g‘risida”gi PF-5139-son farmoniga muvofiq, Davlat boshqaruvi akademiyasi boshqaruv kadrlarini tayyorlash, qayta tayyorlash va malakasini oshirish, shuningdek, davlat va jamiyat boshqaruvi sohasida fundamental hamda amaliy-ilmiy tadqiqotlar olib boruvchi oliy ta’lim muassasasi hisoblanadi.
Qayd etilishicha, Prezident huzuridagi Davlat boshqaruvi akademiyasi tomonidan 2018—2019-o‘quv yilining birinchi yarmida qator ishlar amalga oshirildi. Xususan:
Boshqaruv kadrlarini tayyorlash (magistratura) yo‘nalishi bo‘yicha akademiyada 119 nafar tinglovchi tahsil olmoqda;
Boshqaruv kadrlarini tayyorlash (magistratura) bo‘yicha ishlab chiqarishdan ajralmagan holda 60 nafar, ishlab chiqarishdan ajralgan holda 30 nafar tinglovchi tahsil olmoqda, 30 nafar tinglovchi mazkur yo‘nalish bo‘yicha o‘qishni muvaffaqiyatli tamomladi;
Boshqaruv kadrlari malakasini oshirish akademiya va uning 5 ta hududiy filiali (Urganch, Qarshi, Samarqand, Guliston, Farg‘ona)da amalga oshirilmoqda. O‘tgan davr mobaynida 3 mingdan ziyod rahbar-kadrlar malaka oshirish kurslarida tahsil oldi;
Bugungi kunda 29 nafar professor-o‘qituvchi faoliyat ko‘rsatmoqda, ulardan 10 nafari fan doktori, 11 nafari fan nomzodi bo‘lib, akademiya ilmiy salohiyati 72 foizni tashkil etadi.
Akademiyada ikkita ilmiy darajalar beruvchi ilmiy kengash (huquq, sotsiologiya) faoliyat ko‘rsatmoqda.
Akademiya qoshida Yoshlar muammolarini o‘rganish va istiqbolli kadrlar tayyorlash instituti faoliayt ko‘rsatmoqda. 2018—2019-o‘quv yilining birinchi yarim yilligi holatiga ko‘ra qayta tayyorlash o‘quv kurslarida 47 nafar tinglovchi, malaka oshirish o‘quv kurslarida 137 nafar tinglovchi tahsil oldi.
Oliy va o‘rta maxsus ta’lim sohasida o‘tgan davr mobaynida qanday ishlar amalga oshirildi?
Bugungi kunda respublikada 96 ta oliy ta’lim muassasasi faoliyat ko‘rsatadi. Shu jumladan, respublikada o‘rnatilgan tartibda 13 ta xorijiy oliy ta’lim muassasasi filiali mavjud.
O‘zbekistonda oliy ta’lim olishga bo‘lgan ehtiyojning kattaligi hamda ishlab chiqarishdan ajralmagan holda oliy ta’lim olish imkoniyatini yaratish maqsadida 2018—2019-o‘quv yilidan boshlab 52 ta oliy ta’lim muassasasida sirtqi, 9 ta oliy ta’lim muassasasida kechki ta’lim shakli joriy etildi.
Birgina 2018—2019-o‘quv yilidan boshlab 16 ta oliy ta’lim muassasasida yetakchi xorijiy oliy ta’lim muassasalari bilan hamkorlikda 33 ta ta’lim yo‘nalishi va 14 ta mutaxassislik bo‘yicha qo‘shma ta’lim dasturi asosida kadrlar tayyorlash yo‘lga qo‘yildi.
Oliy va o‘rta maxsus ta’lim vazirligi tizimiga yoshlarni kengroq jalb qilish maqsadida har yarim yilda bir marta O‘zbekiston Yoshlar ittifoqining tegishli kengashlariga tashkilot va oliy ta’lim muassasasidagi mas’ul va rahbar lavozimlarga bo‘lgan real ehtiyojdan kelib chiqib, buyurtma bilan murojaat etish hamda ittifoq tomonidan tavsiya etilgan nomzodlarni kadrlar zaxirasiga kiritish, ularning tegishli lavozimlarda faoliyat yuritishini ta’minlash tizimini joriy etgan.
Izoh (0)