Самарқанд вилоятида 2018 йилда 5215 та умумий жиноятлар содир этилган бўлиб, 2017 йилга нисбатан 32,1 фоизга (7691 та) камайишига эришилган. Бу ҳақда вилояти Ички ишлар бошқармаси Ҳуқуқбузарликлар профилактикаси хизмати ва унинг қуйи тизимларида хизмат олиб бораётган профилактика инспекторларининг йил якуни бўйича амалга оширган ишлари сарҳисоби бўйича ўтказилган йиғилишда айтиб ўтилди, дея хабар бермоқда «Дарё» мухбири Фарҳод Норбўтаев.

Фото: «Дарё»

Муқаддам судланганлар томонидан содир этилган жиноятлар 1137 тадан 755 тага, хотин-қизлар томонидан 741 тадан 623 тага, ёшлар томонидан 2168 тадан 1584 тага, ишсизлар томонидан 970 тадан 521 тага камайишига эришилган.

Фото: «Дарё»

Вилоятдаги 1087 та маҳалланинг 466 тасида жиноятлар сони камайган бўлса, 274 тасида жиноятлар содир этилишига йўл қўйилмаган. Ўтган йилда 5008 та низоли оилалар аниқланиб, уларнинг 4776 таси яраштириш комиссиясида муҳокама этилган. Муҳокама натижасига кўра, 4650 та оилалар яраштирилиб, 1583 та ёш оилаларнинг ажрашиб кетиши олди олинган.

Фото: «Дарё»

Йиғилишда вилоят ИИБ бошлиғининг буйруғи билан, ижобий кўрсаткичларга эришган 30 нафар профилактика инспекторларига пул мукофотлари ва уларнинг ота-оналарига ташаккурномалар, ҳуқуқбузарликлар профилактикасини амалга оширишда юқори рейтинг кўрсаткичларига эришган 3 та шаҳар-туманлар ИИБ бошлиқларига диплом ва компьютер тўпламлари, Ҳуқуқбузарликлар профилактикаси бошқармасига бўйсунувчи Вояга етмаганларга ижтимоий-ҳуқуқий ёрдам кўрсатиш марказига «Damas» автомашинаси топширилди. Бундан ташқари маҳаллаларда кенг жамоатчилик билан ҳамкорликни тўғри йўлга қўйиб, самарали натижаларга эришган 3 нафар профилактика инспекторлари пул мукофотлари билан рағбатлантирди.