2019 йил 1 январдан бошлаб ўтган йил якунлари бўйича йиллик айланмаси (ялпи тушуми) 1 миллиард сўмдан ошган ёки жорий йил давомида ушбу белгиланган чегаравий миқдорга етган юридик шахслар ва якка тартибдаги тадбиркорлар қўшилган қиймат солиғи тўлашга ўтади. Бу ҳақда Фарғона вилояти давлат солиқ бошқармаси матбуот хизмати «Дарё»га маълум қилди.
Қизғин муҳокамаларга сабаб бўлган ушбу янгилик жорий йилнинг 21 ноябрида Фарғона шаҳрида вилоят давлат солиқ бошқармаси томонидан ташкил этилган семинарнинг асосий мавзуси бўлди. Унда Ўзбекистон Республикаси Бош прокуратураси, Ҳисоб палатаси ва Давлат солиқ қўмитасидан тажрибали мутахассислар ҳамда тадбиркорлик субъектлари иштирок этди.
Тадбирда солиқ сиёсатини такомиллаштириш концепциясига мувофиқ 2019 йил 1 январдан жорий этилаётган ўзгаришлар, хусусан, 2018 йил якунига кўра, маҳсулот сотиш йиллик айланмаси (ялпи тушуми) 1 миллиард сўмдан ошган ёки жорий йил давомида ушбу белгиланган чегаравий миқдорга етган микрофирма ва кичик корхоналар ҳамда якка тартибдаги тадбиркорлар бюджетга солиқлар ва бошқа мажбурий тўловларни тўлашнинг умумбелгиланган тартибига ўтказилиши ҳақида батафсил маълумот берилди.
Амалдаги ва солиқ сиёсати концепциясида белгиланган қўшилган қиймат солиғининг ставкалари солиқ солинадиган оборотнинг барча турлари бўйича (ички ва импорт) 20 фоиз, экспорт ва айрим турдаги ижтимоий аҳамиятдаги оборотлар учун 0 фоиз эканлиги таъкидланди.
«2020 йил якунига қадар қўшилган қиймат солиғининг соддалаштирилган тартибини жорий қилиш кутилмоқда, — дейди Давлат солиқ қўмитаси бош инспектори Комил Саидов. — Унга кўра, ҚҚСнинг соддалаштирилган тартибида соҳалар бўйича пасайтирилган солиқ ставкалари белгиланади ва улар бўйича ҚҚСнинг ҳисобга олиш механизми бекор қилинади. Товар айланмаси 3 миллиард сўмгача бўлган корхоналар ҚҚСнинг соддалаштирилган тартибини танлаш ҳуқуқига эга бўлади».
Амалга оширилиши кутилаётган қўшилган қиймат солиғининг соддалаштирилган тартибига кўра, ҚҚСнинг ставкаси чакана савдо учун 5 фоиз, умумий овқатланиш шаҳобчаларига 8 фоиз, дорихона муассасаларига 3 фоиз этиб белгиланиши мумкинлиги иштирокчиларнинг кенг муҳокамасига сабаб бўлди.
Изоҳ (0)