Universal Mobile System уяли алоқа операторининг янги эгаси сентябрь ойида тузилган Рақамли иқтисодиётни ривожлантириш жамғармаси «Рақамли ишонч» бўлади. Ўзбекистон Президентининг 21 ноябрда қабул қилинган қарорига кўра, UMS устав капиталидаги давлатнинг 100 фоиз улуши бепул асосда жамғармага берилади. Бу ҳақда «Газета.uz» хабар берди.
Ҳужжатда қайд этилишича, бундай қарор рақамли иқтисодиётни тез суратларда ривожлантириш, давлат бошқарув тизимини ривожлантириш, ундан фойдаланиш даражасини ошириш, замонавий инфратузилмани қўллаш мақсадида қабул қилинган. Айни пайтда UMS’га 100 фоизлик эгалик Радиоалоқа, радиошиттиришлар ва телевидение марказига тегишли.
Президент ҳузуридаги Лойиҳа бошқаруви миллий агентилигига ва «Рақамли ишонч» жамғармасига икки ой муддат ичида хорижлик мутахассисларни жалб қилган ҳолда 2019—2021 йилларда UMS’ни ривожлантириш Концепциясини ишлаб чиқиш топширилган. Концепция самарадорликнинг асосий кўрсаткичлари ва мамлакатда рақамли иқтисдиётни жорий қилиш учун техник базани яратиш билан бир қаторда, қуйидаги масалаларни кўзда тутиши керак:
оператор бошқаруви тизимига инновацион менежментни жорий қилиш, шу жумладан, мобил хизматлар кўрсатиш соҳасида етарлича тажрибага эга бўлган малакали мутахассисларни жалб қилиш;
ички куч ва воситаларни ишга солиш, телекоммуникацион қурилмаларни модернизация қилиш ва технологик қайта жиҳозлаш;
Ўзбекистон бутун ҳудудининг ривожланган мамлакатлар даражасида интернет тармоғига тўлиқ уланишини босқичма-босқич таъминлаш;
барча давлат хизматларини операторнинг маълумотларни қайта ишлаш маркази орқали кўрсатилишини таъминлаш.
Мобил операторга халқаро телекоммуникация тармоғига тўғридан-тўғри, шу жумладан, фақат ўз эҳтиёжлари учун IP телефонияни қўллаган ҳолда, бошқа операторлар ва провайдерларга овозли телефония ва интернет трафик бўйича халқаро каналларни ташкил этиш бўйича хизматлар кўрсатиш ҳуқуқисиз чиқиш имкони берилди.
UMS’нинг бош офиси Ахборот технологиялари ва коммуникацияларни ривожлантириш вазирлигининг Тошкент шаҳар Нукус кўчасидаги биносида жойлашади.
Изоҳ (0)