Бугун, 19 ноябрь куни Ўзбекистон Бандлик ва меҳнат муносабатлари вазирлигида «Хусусий бандлик агентликлари тўғрисида»ги Ўзбекистон Республикаси Қонунининг кучга кириши масалаларига бағишланган матбуот анжумани бўлиб ўтди. Бу ҳақда «Дарё» мухбири Севара Нишонова хабар берди.
Анжуманда фуқароларни ишга жойлаштириш соҳаси бўйича хизматлар тақдим этувчи ташкилотлар, ОАВ вакиллари, шунингдек мазкур фаолият турига қизиқиш билдирган шахслар ва бандлик ва меҳнат муносабатлари вазирлиги вакиллари иштирок этди.
«Хусусий бандлик агентликларининг ташкил этилиши меҳнат вазирлиги зиммасидаги ишларнинг енгиллашишига хизмат қилади. Нима учун? Сизга айрим рақамларни келтириб ўтаман. Ўтган 10 ой ичида вазирликка ишга жойлашишга кўмаклашиш мазмунидаги 555 мингтадан ортиқ мурожаатлар бўлган. Ушбу мурожаатларнинг 218 мингтаси ижобий ҳал этилган. Энди биз бу ҳуқуқни қанчалик кўп хусусий тадбиркорларга тақдим этсак, шунчалик меҳнат бўйича органлар иши енгиллашади. Шунинг учун ҳам хусусий бандлик агентликлари фуқароларни ишга жойлаштириши ва бундан даромад қилишидан биз яъни вазирлик ҳам манфаатдормиз.
Бунга қадар ҳеч қачон Ўзбекистон фуқароларни ишга жойлаштириш ҳуқуқини хусусий тадбиркорларга бермаган. Фуқароларни ишга жойлаштириш масаласи билан шу вақтга қадар фақат давлат шуғулланган, монополия бор жойда эса доимо коррупция бўлган. Битта мисол келтираман. Президентнинг Қорақалпоғистонга ташрифи олдидан биз Қорақалпоғистон соғлиқни сақлаш тизимида қанча бўш иш жойи борлигини ўргандик. Ҳаммамиз ҳамшира бўлиб ишга жойлашиш қанчалик қийин эканлигини яхши биламиз.
Қорақалпоғистонда соғлиқни сақлаш тизимида 600 дан ортиқ вакант жой борлигини аниқладик. Бу эса бандликка кўмаклашиш марказлари томонидан ошкора эълон қилинмаган.
Биз сизлар билан бирлашиб, биринчидан бўш иш ўринлари ҳақидаги маълумотлар шаффоф бўлишига эришишимиз керак, иккинчидан ушбу бўш ўринларга хусусий бандлик агентликлари ҳам кадрни ишга жойлаштириш имкониятига эга бўлиши керак. Ҳозирда мавжуд бандликка кўмаклашиш марказлари фақат топ-вакант жойлар билан ишлайди.
Биз хусусий бандлик агентликларига вакансияларнинг давлат базасига кириш имконини ҳам беришга тайёрмиз. Хусусий тадбиркор бизнесни давлат даражасидан ҳам яхшироқ ташкил этишини яхши тушунамиз. Бу ҳар доим исботланган», — дейди Шерзод Кудбиев.
Маълумот учун, «Хусусий бандлик агентликлари тўғрисида»ги қонун илк бор «2017—2021 йилларда Ўзбекистон Республикасини ривожлантиришнинг бешта устувор йўналиши бўйича ҳаракатлар стратегияси» нинг 207-бандига мувофиқ ишлаб чиқилган бўлиб, 2018 йилнинг 17 октябридан кучга кирган.
«Хусусий бандлик агентликлари тўғрисида»ги қонун тадбиркорлик субъектларига Ўзбекистонда ва хорижда фуқароларни иш билан таъминлаш билан шуғулланиш имконини беради ва ушбу фаолиятнинг қонуний асосини мустаҳкамлайди.
Изоҳ (0)