Американинг Air Products компанияси президенти Сейфи Гасеми Ўзбекистонга 1 миллиард доллар ва ундан ортиқ инвестиция киритишга тайёр эканлигини маълум қилди. Бу ҳақда «Ўзбекнефтгаз» матбуот хизмати хабар бермоқда, деб ёзади Spot.
Компания Ўзбекистонда саноат газларини (кислород, азот, аргон, водород, синтез-газ ва бошқалар) ишлаб чиқариш, қўллаш ва дистрибуция қилишга қизиқиш билдирмоқда.
Куни кеча ишчи гуруҳнинг биринчи йиғилиши бўлиб ўтди. Йиғилиш якунларига кўра, бозорни ўрганиш ва саноат газларини ишлаб чиқариш бўйича аудит ўтказиш ва таклифлар ишлаб чиқиш ҳақида келишувга эришилди.
«Давлат даражасидаги учрашувларимиз давомида мазкур соҳаларни ривожлантириш ва саноат газларини ишлаб чиқиш бўйича компания ташкил этиш учун Air Products Ўзбекистонга миллиард ва ундан ортиқ АҚШ доллари киритишга тайёр эканлигини маълум қилдик», — дейди Гасеми.
Унинг сўзларига қараганда, аниқ вазифаларни муҳокама қилиш учун компания ва Ўзбекистон ҳукуматидан етакчи мутахассисларни жалб этиш орқали ишчи гуруҳ ташкил этишга қарор қилинган.
Изоҳ (0)