Қайси касб эгаларининг саратонга чалиниш хавфи кўпроқ экани аниқланди
Бошқа соҳа кишиларига нисбатан борткузатувчиларнинг саратон касалига чалиниш хавфи кўпроқдир. Гарвард универститети қошидаги жамоатчилик саломатлиги мактаби мутахассислари шундай хулосага келган, деб ёзмоқда «РИА Новости».
Тадқиқот натижалари Environmental Health журналида чоп этилган. Олимлар 5 мингдан ортиқ борткузатувчилар ҳамда бир хил молиявий шароитга эга 3 мингга яқин эркак ва аёлларнинг саломатлигини таққослади. Маълум бўлишича, кўкрак, бачадон, ошқозон-ичак тракти, қалқонсимон без саратони сингари касалликларга самолёт экипажи ходимлари кўпроқ мойил бўлади.
Масалан, борткузатувчилар орасида кўкрак бези саратони билан касалланиш ҳолатлари 3,4 фоизни ташкил қилган. Таққослаш учун танланган гуруҳда эса бу кўрсаткич 2,3 фоизга тенглиги аниқланган. Кўп болали ёки фарзанд кўрмаган стюардессаларнинг иш стажи кўпайгани сари кўкрак бези саратонига чалиниш хавфи ҳам ортиб бораверади.
Жамоатчилик саломатлиги маркази тадқиқот натижаларига изоҳ берган. Айтилишича, бу ҳолат борткузатувчилар ишининг ўзига хослиги билан боғлиқ. Хусусан, улар катта баландликка кўтарилганда ионли нурланиш билан тўқнашади.
Тадқиқот муаллифлари АҚШда самолёт экипажи ходимларининг саратонга чалиниш хавфи Европадагидан катта эканини маълум қилган.
«Европа Иттифоқида экипажнинг нурланиш даражаси доимий кузатиб борилади ва иш графиклари ҳам шунга таяниб тузилади. АҚШда эса бундай тажриба йўлга қўйилмаган», — дея тадқиқот муаллифларидан бири Ирина Мордюкович Business Insider нашрига интервью берган.
Унинг сўзларига қараганда, борткузатувчилар эҳтиёт чораларини кўрса, саратонга чалиниш хавфини камайтириши мумкин. Масалан, махсус кремлар ёрдамида ультрафиолет нурларидан ҳимояланиш, шунингдек, дам олиш кунлари тўйиб ухлаш, соғлом овқатланиш ва спорт билан шуғулланиш муҳим.
