«Одамларга кўмак бериш, болаларнинг бахтли келажаги учун барча шарт-шароитларни яратиб бериш – бизнинг асосий мақсадимиздир» – Ўзбекистон Республикаси Президенти Шавкат Мирзиёев.
Ўзбекистон Республикаси Мактабгача таълим вазирлиги 1 июнь – Халқаро болаларни ҳимоя қилиш куни муносабати билан ижтимоий лойиҳани ишга тушириб, «Қўлингда имкон» номли мусиқий видеоклипни суратга олди. Бу ҳақда вазирлик матбуот хизмати «Дарё»га хабар берди.
«Қўлингда имкон» қўшиғининг матн муаллифи — Шоира Ғиёсова. Бастакор — «Эътироф» мукофоти совриндори Шуҳрат Зокиров.
Таронани Ўзбекистон халқ артисти Озодбек Назарбеков, Ўзбекистонда хизмат кўрсатган артист Улуғбек Раҳматуллаев, Шаҳзода, Лола, Шаҳриёр, шунингдек, «Булбулча» болалар ансамбли ижро қилган.
«Бизнинг болаларимиз бугун қандай қарор қабул қилишлари ва биз уларга эрта ёшидан ўргатганларимиз, уларнинг ва юртимизнинг келажагини белгилаб беради. Ва ушбу нарсаларга эришишда уларга кўмак бериш – бу бизнинг умумий вазифамиздир», – деб айтади лойиҳа ғоясининг пайдо бўлиш сабабларини изоҳлаб берган Мактабгача таълим вазирлиги вакили Шаҳноза Мирзиёева.
Клипда 300 дан ортиқ киши иштирок этди. Жумладан, «Томоша», «Монстер Кидс», «Алладин» болалар гуруҳлари, «Пахтакор» болалар футбол жамоаси, боғча ва мактаб болалари, бокс бўйича чемпионлар Шаҳрам Ғиёсов, Ҳасанбой Дўстматов, Global Soccer Awards’нинг «Дунёнинг энг яхши ҳаками» номинацияси ғолиби Равшан Эрматов, таниқли футболчи Сардор Рашидов, «Бунёдкор» клуби ва бошқа таниқли қўшиқчилар, актёр ва актрисалар қатнашди.
Клип сценарий муаллифи ва режиссёри — Лола Йўлдошева, тасвирчи Рустам Муродов, иккинчи режиссёр Санжар Маткаримов, рассом Баҳриддин Шамсиддинов, либослар бўйича рассом Ҳилола Шер.
«Мен Мактабгача таълим вазирлигининг бу лойиҳасини мамнуният билан қабул қилдим ва қўллаб-қувватладим. Умид қиламизки, бу лойиҳа болаларга ёрқин ва ёқимли совға бўлади», — дейди Лола Йўлдошева.
Изоҳ (0)