Эронни ўтган йил декабри охирида қамраб олган тартибсизликлар тузум ўзгариши ва инқилобга олиб келиши даргумон. Бу ҳақда Россия Фанлар академияси шарқшунослик институти катта илмий ходими Владимир Сажин маълум қилди, деб хабар беради «РИА Новости».
Эксперт 2009 йилдан бери энг йирик тартибсизликлар иқтисодий омиллардан норозиликдан бошлангани, бироқ кейинчалик расмийлар билан келишмасликка айланиб кетганини билдирди.
«Эроннинг Ироқ, Сурия, Ямандаги фаол ташқи сиёсати катта маблағни талаб қилди, шу сабабли иқтисодий жиҳатдан кўп режалар амалга ошмади. Бу эса аҳолининг норозилигини келтириб чиқарди», — дейди Сажин.
Экспертга кўра, Эронда икки сиёсий гуруҳ — президент Ҳасан Руҳоний бошчилигидаги либерал ислоҳотчилар ва оятуллоҳ Хоманаий жорий этган тизимга содиқ консерваторлар ўртасида кураш кетмоқда.
«Мазкур тартибсизликлар у томонга ҳам, бу тарафга ҳам бирдек наф келтиради. Бироқ янги инқилоб рўй беради ва тузум ағдарилади деб ўйламайман», — таъкидлади Владимир Сажин.