Лос-Анжелесда салкам бир миллион обуначига эга Гарретт Уоттс исмли видеоблогер яшайди. Йигитча ўзининг YouTube’даги роликлари билан эмас, балки Twitter’даги пости билан кўпчиликнинг эътиборига тушди, деб хабар берди Afisha Daily.
2017 йилнинг 7 декабрь санасида Гарретт ўз квартирасининг эшигини очган. Ташқари совуқ бўлганлиги ҳамда шамол эсганлиги сабаб блогернинг хонадонига чигиртка кириб қолган. Уоттс «меҳмон»ни ҳайдаш ўрнига бўш аквариум топиб, ҳашарот учун «меҳмонхона» ясаган. Шунингдек, блогер у ерга Швейцария пишлоғини, тузланган бодринг бўлагини, сув солинган идишни ва Фрэнк Оушеннинг қўшиқлари ижро этилаётган наушникни жойлаштирган. Музлаб қолган чигирткани иситиш учун унинг ёнига шам ёқиб қўйган.
Эртаси кунига ҳаво илигач, Уоттс чигирткани қўйиб юборган. Блогер ўз постининг остига ҳашаротга ҳеч нима қилмаганига умид қилишини изоҳ сифатида ёзиб қолдирган. Бир нарса аниқки, чигирткага нима бўлганида ҳам, у Фрэнк Оушеннинг қўшиқларини эшитмаган, чунки AirPods наушниклари қулоқдан олингач, у автоматик тарзда ўчади.