Бирлашган Миллатлар Ташкилоти Тараққиёт дастурининг Глобал экология жамғармаси томонидан Ўзбекистоннинг Жиззах ва Бухоро вилоятлари чорвадорлари учун тиркама — кўчиб олиб юриладиган уй тайёрланди. Бу ҳақда БМТ ахборот хизмати хабар бермоқда.
Иккита кўчиб олиб юриладиган мобил уй Жиззах вилоятининг Зомин туманидаги фермер хўжалигига ва Бухоро вилоятининг Қоракўл туманидаги чорвадор чўпонга топширилди.
«Чорвадорлар чорва молларини боқиш вақтида бир жойда кўп ушланиб қолмайди, мавсум вақтида чорва молларини боқиш учун янги участкаларга ўтади ва ўша жойларда оддий усулда вақтинчалик қўлбола уй қуриб олади ёки ҳамқишлоқлари билан биргаликда яшаш, дам олиш ва овқатланиш учун тегишли шароитлари бўлмаган оддий вагончаларда ёки қурилиши чала биноларда яшайди. Чорвадорлар мавсум давомида уч—тўрт марта кўчиб юради ва ҳар сафар ўзлари билан янгидан уйча қуриш учун зарур бўладиган қурилиш материалларини ва асбоб-ускуналарини олиб юради. Лойиҳа томонидан топширилган мобил уй тиркама сифатида, кўчириб олиб юришга мослаштирилган. Улар яйлов–чўл ҳудудларининг хоҳлаган қулай жойда ўрнатилиб, чўл ҳудудида чорвадорлар учун замонавий яшаш шароитини яратиши мумкин», — дейилади хабарда.
Мобил — кўчиб олиб юриладиган тиркама уйда уч кишининг яшаши ва ишлаши вақтида бирламчи маиший эҳтиёжларини қондириш учун зарур бўладиган барча шароитлар тўлиқ яратилган. Тиркама уйда чорвадорларнинг дам олиши, ухлаши ва овқатланишига етарли жой, икки бўлмали газ плитаси, кичик музлатгич, қўл ювиш жиҳози, озиқ-овқат маҳсулотлари ва шахсий буюмларни сақлаш учун шкаф-тумбалар мавжуд.
Мобил-уйнинг том қисмида 150 ватт кучига эга қуёш батареяси ўрнатилган бўлиб, у уйнинг ички ва ташқарисидаги чироқларни ёритиш, кичик музлатгич, маиший жиҳозлар ва қўл ювиш жиҳозига сув узатадиган насосни ишлаши учун етарли миқдорда электр энергия ишлаб чиқаради.
Мазкур мобил-уйнинг бир донаси Қоракўл тумани «Қоракўл» наслчилик масъулияти чекланган жамиятида узоқ йиллардан бери чорвачилик билан шуғулланиб келаётган, авлодлари билан чорвадор ҳисобланган бош чўпон Абдумалик Жўраевга берилди. Иккинчи мобил уй эса Зомин туманининг яйлов—лалми ҳудудида фаолият кўрсатаётган «Тутак Карим даласи» фермер хўжалигининг раҳбари Абдулла Жўраевга топширилди.
Шу вақтгача фермер хўжалигининг чўпонлари чорва молларини узоқ яйлов ҳудудларига ҳайдаб кетганида зарур санитария шароитлари бўлмаган, оддий брезент ёки полиэтилен палаткаларда яшаган.
Изоҳ (0)