Бухоро вилояти божхона бошқармаси «Олот» чегара божхона комплекси ходимлари томонидан хорижий фуқаро А.Абдулқаҳҳор бошқарувида Туркиядан етиб келган юк автотранспорт воситаси кўригидан ўтказилганда божхона қоидабузарлиги фош бўлди. Бу ҳақда «Дарё» га бошқарма ахборот хизмати маълум қилди.
Йўл-юк кузатув ҳужжатларига кўра, Тошкент шаҳридаги Endless Business корхонаси номига келтирилаётган юклар қиймати салкам 20 минг АҚШ долларини ташкил қилувчи 23 тоннадан ортиқ қурилиш материаллари бўлиши лозим эди. Аммо божхона кўриги давомида контейнердаги товарлар билан йўл-юк кузатув ҳужжатларидаги маълумотлар ўртасида тафовут мавжудлиги аниқланди.
Содда қилиб айтганда, мазкур товарлар ҳужжатлардагидан кўра ортиқча миқдорда эканлиги маълум бўлди. Йўл-юк кузатув ҳужжатларидан қайд этилмаган қурилиш материалларининг умумий қиймати 648 миллион сўмни ташкил қилди.
Шунингдек, Хитойдан Фарғона шаҳридаги «Намуна савдо минбари» МЧЖ номига темир йўл контейнерида юборилган юклар ҳам божхона кўригидан ўтказилганда, йирик миқдордаги товар-моддий бойликларнинг ноқонуний равишда олиб кирилишига чек қўйилди.
Йўл-юк кузатув ҳужжатларига кўра, ушбу контейнерда 25 тоннадан ошиқ оғирликдаги кафеллар бўлиши лозим эдим. Кўздан кечириш давомида ушбу товарлар ўрнига ҳужжатларда умуман кўрсатилмаган, қиймати 3,7 млрд сўмдан ортиқ кийим-кечаклар борлиги аниқланди.
Божхоначиларнинг кўзини шу тариқа шамғалат қилишга уринган қонунбузарлар бу усуллари билан давлат бюджетига ундирилиши лозим бўлган 4 миллиард сўмдан ортиқ божхона тўловларидан бўйин товлаган.
Мазкур қонунбузилиш ҳолатларида аниқланган тафовутлар тадбиркорлик субъектлари томонидан тўла бартараф қилингач ва белгиланган миқдордаги божхона тўловлари ундирилганидан сўнг ушбу товар-моддий бойликлар божхона расмийлаштирувидан ўтказиб берилмоқда.
Изоҳ (0)