Азамат Абдураимов Жаҳон термаси сафида Россия дарвозасига ҳам гол урди. Бироқ чемпион бўла олмади

Қозоғистоннинг Астана шаҳри мезбонлик қилган EXPO—2017 футбол турнири ўз якунига етди.

Унда олти жамоа ғолиблик учун кураш олиб бораётгани ҳақида айтилган бўлиб, ўзбекистонлик Азамат Абдураимов Жаҳон термаси сафига жалб қилинганди.

Кеча — 6 август куни мусобақанинг финал ўйинида Жаҳон термаси Россия юлдузларига қарши майдонга тушди ва 4:7 ҳисобида имкониятни бой берди, деб ёзди «Championat.asia» нашри. Унда ўйнаган Азамат Абдураимов 1 та гол уришга муваффақ бўлди. Аввалроқ у гуруҳ босқичида Германия ва Қозоғистон термалари постини ҳам ишғол қилганди.

Шу тариқа Роман Широков, Евгений Алдонин, Виктор Булатов, Дмитрий Сенников каби машҳур футболчилари бор бўлган Россия термаси EXPO—2017 ғолибига айланди. Венсан Кандела, Эрнан Креспо, Азамат Абдураимов, Христо Стоичков, Яри Литманен, Муҳсин Муҳамадиев, Жан-Пьер Папен, Алдаир каби футболчилар тўп сурган Жаҳон термаси вице-чемпион номига сазовор бўлди.

Турнирнинг учинчи жамоаси бўлиш Португалияга насиб қилди, Қозоғистон 4, Италия 5, Германия термаси эса 6-ўрин билан кифояланди.