Грузиялик мутахассис Шота Арвеладзе фаолиятини Ўзбекистонда давом эттиришини тасдиқлади, деб маълумот берди «Championat.asia» нашри.
Аввалроқ Тошкентнинг «Пахтакор» клуби у билан музокара ўтказаётгани хабар берилганди. Арвеладзенинг қайд этишича, қарор қабул қилинган ва фақатгина расмиятчилик қолган.
Менга Россия ва Голландиядан ҳам таклифлар бўлди. Аммо Ўзбекистонга боришга қарор қилдим, чунки энг яхши таклиф шу ердан тушди. Расмиятчиликлар ҳал қилинса, Ўзбекистонда ишлайман.Тошкентнинг «Пахтакор» клуби Ўзбекистон Олий лигасида 18 очко билан 7-ўринни эгаллаб турибди. Янги мураббий жамоани иккинчи давра олдидан қабул қилиб олиши катта эҳтимол.Нима бўлади, қандай бўлади ҳозирча билмайман. Айтишим мумкин бўлгани, у ердаги инсонлар билан яхши танишман.
Шота Арвеладзе, грузиялик мураббий
Арвеладзе Грузия терма жамоаси учун энг кўп гол урган футболчи ҳисобланади — 60 та ўйинда 26 та гол.
У футболчилик вақтида Туркиянинг «Трабзонспор», Голландиянинг «Аякс» ва «АЗ Алкмаар», «Шотландиянинг «Рейнжерс», Испаниянинг «Леванте» каби клубларида тўп сурган. Мураббий сифатида Туркиянинг «Кейсириспор» (2010—2012), «Қосимпошша» (2012—2015), «Трабзонспор» (2015) ва Исроилнинг «Маккаби» (2016—2017) клубларида ишлаган.
Арвеладзе мутахассис сифатида катта ютуқларга эришмаган. Бу борадаги фаолиятини у «АЗ Алкмаар» клубида Луи Ван Галга ёрдам бериш билан бошлаган.
Футболчи сифатида эса «Аякс» билан Голландия чемпионлиги ва кубоги, «Рейнжерс» билан Шотландия чемпионлиги ва кубогини қўлга киритган. 1994, 1998, 2007 йилги мавсумларда Грузиянинг энг яхши футболчиси сифатида тан олинган. 1995/96 йилги мавсум Туркия чемпионатининг энг яхши тўпурари бўлган.
Изоҳ (0)