Инсониятда ҳали ҳам умид борлигини исботловчи 10 та воқеа

AdMe инсониятда ҳамон ишонч ва умид борлигини исботловчи воқеаларни тақдим этишга қарор қилди.

1. Канадада авиатармоқлар 80 минг кишини уларнинг уй ҳайвонлари билан бирга эвакуация қилди

   

Ўрмон ёнғинлари Форт Мак-Мюррейни дунёдан узиб қўйганда оммавий эвакуация бошланди. Бир неча ўн минглаб одам имкон борича тезроқ шаҳарни тарк этиши лозим эди. Уй ҳайвонларичи? Уларни самолётда ўзи билан бирга олиш учун бир қанча ҳужжат талаб қилинади. Авиатармоқ раҳбарияти уй ҳайвонларини ортиқча қоғозларсиз ўзи билан бирга олишга рухсат берди.

2. Футбол жамоасига қўшилишни истаган йигит барча анжомларга эга бўлди

   

Бу сурат инсоният учун ғурурланиш ҳиссини уйғотади. Марко футбол бўйича мактаб жамоасига қўшилишни орзу қиларди. Бироқ унинг оиласи спортзал учун абонемент ёки тренажёрлар имкониятига эга эмас эди. У таслим бўлмади ва жисмоний ҳолатини яхшилаш учун мана шу усулни ўйлаб топди. Тасодифий ўткинчи томонидан олинган унинг сурати ижтимоий тармоқда пайдо бўлиши билан Марко ва унинг оиласи ҳаёти ўзгариб кетди. Бутун дунёдан одамлар унга спорт жиҳозлари ва қўллаб-қувватловчи тилакларни юбора бошлади.

3. Португалиялик болакай Франциянинг йиғлаётган мухлисини юпатди

   

BBC каналининг видеосини аллақачон бир неча миллион киши томоша қилди. Унда Франция термасининг хафа бўлган мухлисига Португалия ўйинчиси формасидаги ўғил бола яқинлашиб, эркакнинг елкасига қоқиб қўяди, кейин эса уни қучоқлайди. Воқеа футбол бўйича Евро-2016 финалида Португалия терма жамоаси Франция термасини мағлуб қилгандан сўнг юз берган. Спортдаги қарама-қаршилик ва қизғинлик ҳам инсон эканлигимизни ёдда тутишга халақит бермаслиги керак.

4. Чиқинди ташувчи машина ҳайдовчиси йил давомида деразадан унга қўл силкитган қизалоқни туғилган куни билан табриклади

   

Ҳафтанинг ҳар пайшанба куни Бруклин исмли қизалоқ чиқинди ташувчи машина ҳайдовчисига қўл силкитишга одатланди. Ҳайдовчи ҳам унга жавобан қўл силкитар ва саломлашиш тариқасида бир неча марта сигнал чалиб қўярди. Қизалоқнинг туғилган куни ҳам пайшанбага тўғри келди ва у онасига кулиб турадиган ҳайдовчини кекс билан меҳмон қилиш истаги ҳақида маълум қилди. Бу сафар ҳайдовчини қизчанинг онаси тўхтатди ва ҳайдовчи кичкина дўстини туғилган куни билан табриклади. У ўз вазифасини бажариш учун йўлида давом этар экан, қизалоқ онасига қанчалик бахтли эканлигини маълум қилди.

5. Мактаб ўқувчилари автоҳалокатга учраган синфдоши учун битирув оқшомини қайта ўтказди

   

Скотт Данн ҳушига келганда биринчи навбатда онасидан: «Бугун неччинчи сана? Наҳотки битирув оқшомини ўтказиб юборган бўлсам?» — деб сўради. Йигит бу кунни сабрсизлик билан кутган, бироқ автоҳалокат туфайли шифохонага тушиб қолган эди. Унинг аҳволи яхшиланиб, мактабга чиққан куни байрам садолари ва табрик сўзлари қайтадан жаранглади. Бироқ бу сафар фақат битта диплом топширилди.

6. Туғилган кунига ҳеч ким келмаган қизни бутун дунё қўллаб-қувватлади

   

Facebook фойдаланувчиларидан бири туғилган кунига ҳеч ким келмаган синглиси суратини ижтимоий тармоққа жойлади ва унга шунчаки откритка юборишни илтимос қилди. Хейли 18 ёшини ёлғиз нишонлади, бироқ эртаси куни откритка ва совғалар унинг почта қутисига сув тошқини каби ёпирилди.

7. Талабалар уй ҳайвони ҳалок бўлган ўқитувчисига мушукчалар совға қилди

   

Техаслик ўқитувчи энг яқин уй ҳайвони Блонди исмли мушуги вафотидан жуда сиқилди. Ўқувчилар математика ўқитувчиси ҳар танаффусда кўз ёш тўкаётганини пайқади. Улар ўқитувчисига оқ атиргуллар гулдастаси ва иккита мушукчани совға қилганда аёлнинг қайғу ёшлари севинч ёшларига айланди.

8. Бошланғич мактаб ўқитувчиси тўлиқ бўлмаган оилалар ўғил болалари учун «Жентлменлар клуби»ни ташкил этди

   

Жанубий Каролина бошланғич синфларининг ўқитувчиси ўз синфидаги безори болалар билан келишиш йўлини топди. У бир нечта бўйинбоғ ва пиджаклар харид қилди ва ҳар ҳафта энг тўполончи болаларни тўплай бошлади. Ўз дарсларида эса оталар ўз ўғилларига ўргатадиган нарсалар: бўйинбоғ боғлаш, катталар билан муомала қилиш қоидалари, она, буви ёки сингилларига ғамхўрлик қилиш кабилар  ҳақида ҳикоя қилди. Ўқитувчи смокинг кийган бола ҳеч қачон жанжал чиқармаслигига ишонади. «Улар ёмон бўлганлиги учун эмас, эътибор ва ғамхўрлик етишмаганлиги учун ўзларини ёмон тутади», — дейди у.

9. Ягуар Бразилия армияси полкининг ўғлига айланди

   

Бразилия армияси аскарлари Amazonка чангалзорларидан кичкина ягуарни топиб олганда у аранг тирик қолган эди. Улар ҳайвонни ўзлари билан олиб кетишга қарор қилди. Маҳаллий ҳукумат ягуарни армияда қолдиришга рухсат берди. Ҳозирда Жикитая номини олган ягуар уни ўлимдан сақлаб қолган кишилар орасида.

10. Стюардесса инсультни бошдан кечирган эркакни овқатлантириб қўйди

    

Яқинда инсультни бошдан кечирган 71 ёшли эркакка самолётнинг биринчи қаторидан қулай кресло ажратишди. Бироқ тушлик тарқатган стюардесса йўловчи қошиқни тута олмаётганлигини пайқади. Шунда у эркакни овқатлантириб қўйди ва бегона одамнинг ғамхўрлигидан йиғлаб юборган эркакнинг кўз ёшларини артиб қўйди.