Салом, Чемпионлар лигаси. «Юнайтед» Моуриньо билан Европа лигасида зафар қучди

Англиянинг «Манчестер Юнайтед» клуби Европада нуфузи жиҳатдан иккинчи рақамли клублар мусобақаси ҳисобланган Европа лигасида зафар қучди.

Стокгольмдаги «Френдс Арена»да ўтган финал беллашувида «Юнайтед» футболчилари Амстердамнинг «Аякс» клубига қарши саф тортди ва 2:0 ҳисобида зафар қучди. Голлар мавсум аввалида «манкунианлар» сафига келиб қўшилган Поль Погба ҳамда Генрих Мхитарян томонидан урилди.

Мазкур ғалаба «Юнайтед» учун Чемпионлар лигаси эшикларини очиб берди ва Жозе Моуриньо шогирдлари танаффусдан сўнг энг нуфузли клублар мусобақасига қайтишга муваффақ бўлди. Голландия вице-чемпиони сифатида «Аякс» бу вазифани олдинроқ уддалаб бўлганди.

Моуриньо «Юнайтед»даги илк мавсумидаёқ 3 та соврин ютиб олди. Ўзининг биринчи ўйинидаёқ «Лестер»ни таслим қилиб, Англия Суперкубогини ютган манчестерликлар, кейинроқ Англия Лига кубогида зафар қучди. Ва мана энди улар Европа лигасида муваффақият қозонди.

Европа лигаси Финал 24 май, чоршанба

«Аякс» — «Манчестер Юнайтед» 0:2