Сўровнома америкаликларнинг ярмидан кўпи президент сайловига Россия аралашганига ишонишини кўрсатди

The Washington Post ва ABC News биргаликда ўтказган сўровнома якунларига кўра, америкаликларнинг 56 фоизи президент сайловига Россия аралашганига ишонади. Бу ҳақда «Газета.ru» хабар бермоқда.

Респондентларнинг 39 фоизи АҚШ президенти Дональд Трамп жамоаси Россия билан тил бириктирган деб ҳисоблайди, 12 фоизи эса Россия аралашишга уринганига, аммо Трампга ёрдам бермаганига ишонади.

35 фоиз сўровдан ўтганлар Россия сайловга аралашмаган деб ҳисоблайди.

Респондентларнинг 32 фоизи собиқ президент Барак Обама маъмурияти Трамп ортидан жосуслик қилганига ишонади, 56 фоизи эса буни инкор қилади.

Шунингдек, 42 фоиз респондент Конгресс мазкур масалада адолатли суриштирув ўтказа олишига ишонади.