Исроилнинг «Иҳуд Леуми» партияси ёшлар қаноти вакиллари 20 апрель куни «Офер» қамоқхонаси деворлари ёнида тадбир ўтказди. Қамоқхонада «Фатҳ» ва «Ҳамас» гуруҳларининг очлик эълон қилган террорчилари сақланади, деб ёзади TJournal.
Фаоллар қамоқхона деворлари остида мангаллар ўрнатиб, очлик эълон қилганларга ҳузур бағишлаш учун уларда шашлик пиширди.
«Ихуд Леуми» партияси Исроил армияси ҳалок бўлган ҳарбий хизматчиларининг жасадларини қайтарилишига эришиш учун ҳукуматни террорчиларни сақлаш шароитларини кескинлаштиришга чақирмоқда.
«Бу террорчилар тўдаси бизга очлик билан таҳдид қилмоқда. Улар бундай норозилик қилаётганидан бахтлимиз. Улар қанча хоҳласа шунча қийналсин», — дейди тадбир ташкилотчиси Офер Софер.
17 апрель куни Исроил қамоқхоналарининг юзлаб маҳбуслари очлик эълон қилган эди. Улардан аксарияти собиқ жангарилардир. Исроил қамоқхоналар бошқармасининг баҳолашича, унда 1 200 га яқин одам иштирок этмоқда.
Акция бешта қотиллик ва бир неча ўнлаб терактни режалаштиргани учун беш карра умрбод қамоқ жазосини ўтаётган Марван Баргути томонидан ташкил этилган. 16 апрель куни унинг рафиқаси The New York Times нашрига тақдим этган хатда Баргути оммавий асоссиз ҳибсга олишлар ва фаластинлик маҳбуслар билан шафқатсиз муомалада бўлиш туфайли очлик эълон қилишга мажбур бўлганлигини маълум қилган.