Бухоро вилоятида соғлиқни сақлаш тизимидаги вазият ва амалга ошириладиган ишлар муҳокамасига бағишланган йиғилиш бўлиб ўтди. Бу ҳақда вилоят ҳокимлиги матбуот хизмати хабар бермоқда.
Тадбирда корхона, ташкилот, муассасалар раҳбарлари, ҳуқуқни муҳофаза қилиш органлари ва соғлиқни сақлаш тизими ҳамда ОАВ ходимлари иштирок этди.
Йиғилишни вилоят ҳокими Ў. Барноев олиб борди.
Тадбирда қайд этилганидек, аҳолига тиббий патронаж хизмати кўрсатиш, қишлоқ врачлик пунктларида аҳолини патронаж билан тўлиқ қамраб олиш даражаси пастлигича қолмоқда. Шунингдек, чекка ҳудудларда ОИТС, хавфли ўсма, сил, вирусли гепатит билан касалланиш ҳолатлари олдинги йилларга нисбатан кўпайгани тиббий хизмат борасида эътиборсизликка йўл қўйилаётганидан дарак беради.
Йиғилишда вилоят кўп тармоқли тиббиёт маркази бош врачи К. Газиев, вилоят «Она ва бола» скрининг маркази раҳбари Д. Аҳмедова, болалар юқумли касалликлар касалхонаси бош врачи У. Исмаилов ва бошқа раҳбарлар томонидан соҳани ривожлантиришга оид кўплаб таклифлар ўртага ташланди.
Йиғилишда вилоят ҳокими муаммоларни ҳал этиш борасидаги вазифалар хусусида атрофлича тўхталди. Соҳа мутасаддиларига мавжуд камчиликларни бартараф этиш юзасидан тегишли топшириқлар берилди.
Изоҳ (0)