«Пахтакор» асосий футболчиси Жалолиддин Машариповни ашаддий рақобатчиси бўлган «Локомотив»га ижарага берди

Ўзбекистон миллий терма жамоаси аъзоси ҳисобланган Жалолиддин Машарипов фаолиятини Тошкентнинг «Локомотив» футбол клубида давом эттиради. «Пахтакор» матбуот хизмати ярим ҳимоячининг 6 ойга ижарага берилгани тўғрисида хабар берди.

Машариповнинг «пахтакорчилар» билан яна икки йиллик шартномаси бор. Шунинг тўртдан бир қисмини у «темирйўлчилар» сафида ўтказади.

Қайд этиш керак, «Пахтакор» 2016 йилги мавсумни 5-ўринда якунлагани учун халқаро майдонда иштирок этмайди. «Локомотив» эса Осиё Чемпионлар лигасининг гуруҳ босқичида Ўзбекистон шарафини ҳимоя қилади. Бунга қадар мамлакат чемпиони ярим ҳимояда тўп сурадиган икки асосий футболчиси — Санжар Шоаҳмедов ҳамда Сервер Жепаровни хориж клубларига қўйиб юборганди. Сервер Жепаров Эроннинг «Истиқлол» клуби билан, Санжар Шоаҳмедов эса Қатарнинг «Ас-Сайлия» клуби билан 1,5 йиллик келишувга эришганди.

Жалолиддин Машарипов «Локомотив»даги бу йўқотишлар ўрнини тўлдиришга ҳаракат қилади. У «Пахтакор» учун 64 та учрашувда иштирок этиб, 10 та гол уришга муваффақ бўлган. Мамлакат кубогида 16 та ўйинда иштирок этган ва 1 та гол урган. Унинг Осиё Чемпионлар лигасида тўп суриш тажрибаси ҳам бор: 12 та беллашув ва 1 та гол.

Маълумот учун, 2016 йил сўнггида «Локомотив» устози Мирко Йеличич ва клуб сардори Тимур Кападзе Жалолиддин Машариповни мавсумнинг энг яхши уч футболчиси қаторига киритганди.