Ўзбекистон Қуролли Кучлари ташкил этилганининг 25 йиллиги ҳамда 14 январь — Ватан ҳимоячилари куни муносабати билан божхона органлари ходимлари учун Тошкентнинг Сергели туманида иккита замонавий кўп қаватли уй фойдаланишга топширилди. Бу ҳақда ЎзА хабар бермоқда.
Замонавий шаҳарсозлик ва бинокорлик талабларига тўла мос, табиий иқлим шароитини ҳисобга олган ҳолда қисқа муддатда бунёд этилган мазкур уйлар барча шарт-шароит ва қулайликларга эга, деб таъкидланади хабарда.
Хизмат уйларининг тантанали очилиш маросимида Давлат божхона қўмитаси марказий аппарати, Тошкент шаҳри ва вилоят божхона бошқармалари, «Тошкент-Аэро» ихтисослаштирилган божхона комплекси, Олий ҳарбий божхона институти, Миллий кинология маркази ходимлари, божхона фахрийлари ҳамда оммавий ахборот воситалари ходимлари иштирок этди.
Давлат божхона қўмитаси раиси ўринбосари Ғ. Шукуров ва бошқалар мамлакатда амалга оширилаётган кенг кўламли ислоҳотлар аҳолининг, жумладан, божхона органлари ходимларининг турмуш фаровонлигини янада оширишга хизмат қилаётганини таъкидлади.
Изоҳ (0)