Испаниянинг «Барселона» клуби ҳимоячиси Жерар Пике келажакда ушбу жамоа президенти бўлиш истагини билдирди. Бу ҳақда, «Sport.es» порталига асосланиб, «ТАСС» хабар бермоқда.
29 ёшли футболчи каталонияликлар билан 2019 йилгача амал қиладиган шартномасини яна 4–5 йилга узайтиради ва бу унинг сўнгги келишуви бўлади. «Барселона» клуби низомида футболчи фаолиятини якунлаганидан икки йил ўтиб президентликка даъвогарлик қилиши мумкинлиги кўрсатилган.
«Барселона» клубининг кейинги президент сайлови 2021 йилда бўлиб ўтади. Пике эса ушбу лавозимга фақатгина 2027 йилда даъвогарлик қилиши мумкин.
Маълумот учун, Жерар Пике 2008 йилдан буён жамоа шарафини ҳимоя қилиб келмоқда. Жамоа таркибида ҳимоячи тўрт карра Испания чемпиони, беш карра Испания Суперкубоги соҳиби, уч марта ЕЧЛ ғолиби бўлган. Испания терма жамоаси сафида эса Пике 2010 йилда жаҳон чемпиони, 2012 йилда Европа чемпиони бўлган.