Россиянинг Бурятия республикасида яшовчи эркак Байкал кўлида чўкаётган хотинини қутқаришга ёрдам берган ёш йигитлар жамоасига пичоқ билан ташланди, бунинг оқибатида йигитлардан бири ҳаётдан кўз юмди, яна бири шифохонага ётқизилди. Бу ҳақда «РИА Новости» хабар бермоқда.
Тергов маълумотларига қараганда, гумондор Байкал бўйида, Усть-Баргузин қишлоғидан 4 километр нарида рафиқаси билан спиртли ичимликлар ичиб ўтирган эди. Улар чўмилишга қарор қилди, лекин бир муддатдан сўнг аёл чўка бошлади. Шу атрофда дам олаётган ёшлар жамоаси унинг қичқириқларини эшитиб, ёрдамга ошиқди. Улар жабрланувчи аёлни соҳилга олиб чиқишда кўмаклашди.
Аммо маст бўлган эркак уларнинг хатти-ҳаракатларини эгриликка йўйиб, жанжал кўтарди, сўнг ўз қўнимгоҳига кетиб, пичоқ билан қуролланди ва йигитларни кута бошлади. Ёшлар аёлни ўзига келтириб, уни ўша томонга кузатиб қўйди. Аммо уларнинг қаршисидан қўлидан пичоқ тутган эр чиқди.
Эркак йигитлардан бирининг сонига, яна бирининг иягига пичоқ солди. Сонидан яраланган киши кўп қон йўқотиши оқибатида оламдан ўтди. Иккинчи ярадорга тиббий ёрдам кўрсатилди, унинг ҳаёти хавф остида эмас.
Жиноятчи қўлга олинди. Сўроқ чоғида у ёшлар тўдасидан ўзини ҳимоя қилиш мақсадида пичоқ билан қуролланганини иддао этди.