Мексиканинг Кинтана-Роо штати ҳукумати «Эрл» довулининг яқинлашиши муносабати билан 3 август, чоршанба кечқурун бир нечта соҳилбўйи туманлари аҳолисини эвакуация қилди. Бу ҳақда «ТАСС» хабар берди.
Белиз давлати билан чегарадош муниципалитетлардан 78 та оила хавфсиз ҳудудларга етказилган.
Бундан ташқари, Pemex давлат нефть-газ компанияси Мексика кўрфазидаги нефть қазиб олиш платформаларидан ўз ходимларини чиқариб кетишни бошлади.
Мексика Миллий метеорологик хизматининг маълум қилишича, «Эрл» Четумаль шаҳридан тахминан 130 километр масофада бўлиб, ғарбга қараб ҳаракатланмоқда. Шамолнинг тезлиги секундига 33,3 метр, кучайганда эса 41,6 метргача етади. Яқин соатларда Белиз ва Мексиканинг бир қатор туманларига кучли жала ёпирилиши кутилмоқда.