Дилма Руссефф Бразилия президентлигидан вақтинчалик четлатилишини «тўнтариш» ва «сиёсий ўйин» деб ҳисоблайди. Бу ҳақда «ТАСС» хабар бермоқда.
Президентлик саройини тарк этишдан бурун аёл миллатга мурожаатини амалга оширди.
«Фақатгина менинг мандатим эмас, балки сайловларга ҳурмат, Бразилия халқи суверенитети ва конституцияси ҳам шубҳа остида турибди», — деди у ўз мурожаатида.
Шунингдек, у таслим бўлмаслигини, давом этаётган импичмент жараёнига тинч йўллар билан қаршилик кўрсатишини билдирди.
«Мен хатолар қилганман, аммо жиноят содир этмаганман», — қўшимча қилди мамлакат етакчиси.
Саройни тарк этгач, у давлат раҳбари қароргоҳи биноси олдида тўпланган тарафдорлари орасида чиқиш қилди. Руссефф ўзининг четлаштирилишини Бразилиянинг ёш демократияси учун фожиали кун бўлганини билдириб, ўзини катта адолатсизлик қурбони деб атади.
Изоҳ (0)