2016 йилнинг 13—30 октябрь кунлари Баҳрайнда 19 ёшгача бўлган футболчилар ўртасида бўлиб ўтадиган Осиё чемпионатига тайёргарлик кўраётган Жасур Абдураимов бошчилигидаги Ўзбекистон ёшлар терма жамоаси Саудия Арабистонининг Ал-Хобар шаҳрида ўтказилаётган йиғин доирасида Саудия Арабистонига қарши иккинчи ўртоқлик ўйинида майдонга тушди. Бу ҳақда Ўзбекистон футбол федерацияси матбуот хизмати хабар бермоқда.
30 апрель, шанба куни бўлиб ўтган учрашувда Саудия Арабистони ёшлар терма жамоаси 3:2 ҳисобида ғалаба қозонди.
Ўйинда ҳисобни ўзбекистонлик ёшлар очди. 6-дақиқада Ойбек Рустамов аниқ зарбаси билан рақиб дарвозасини ишғол қилди. Орадан 5 дақиқа ўтиб, ҳисоб тенглаштирилди. Биринчи бўлим якунига қадар томонлар яна биттадан гол уришга муваффақ бўлди. 40-дақиқада Умид Эргашев қўриқлаётган дарвоза томон 11 метрлик жарима зарбаси белгиланди ва у аниқ амалга оширилди. 42-дақиқада эса Азиз Ғаниев жарима тўпини қойилмақом бажариб, ҳисобни тенглаштирди – 2:2.
Учрашув асосий вақтига қўшиб берилган дақиқаларда Жасур Абдураимов шогирдлари рақиб қарши ҳужумини ўтказиб юборди ва саудияликлар бу ҳужумни гол билан якунлади – 3:2.
Эслатиб ўтамиз, 28 апрель куни бўлиб ўтган дастлабки ўйинда ҳам 3:2 ҳисоби қайд этилган ва Саудия Арабистони ёшлар терма жамоаси ғолиб бўлганди.
Қайд этиш жоиз, 30 апрель, шанба куни Баҳрайн пойтахти Манама шаҳрида ёшлар ўртасидаги Осиё чемпионати U-19 финал босқичига қуръа ташлаш маросими бўлиб ўтди. Унга кўра, Ўзбекистон ёшлар термаси «D» гуруҳидан жой олди. Жасур Абдураимов бошчилигидаги жамоага гуруҳда Хитой, Австралия ҳамда Тожикистон ёшлар терма жамоалари қарши баҳс олиб боради .
Ўртоқлик учрашуви
30.04.2016, Ал-Хобар
Саудия Арабистони U-19 – Ўзбекистон U-19 3:2
Ўзбекистон голлари: Ойбек Рустамов (6), Азиз Ғаниев (42)Ўзбекистон U-19: Умид Эргашев, Ойбек Рустамов, Ислом Қобилов, Ҳусниддин Ғофуров, Хожиакбар Алижонов, Азиз Ғаниев, Нурилло Тўхтасинов, Шароф Муҳиддинов, Санжар Қодирқулов, Илҳом Алижонов, Бобир Абдухолиқов.
Захира: Умид Ҳамроев, Беҳзод Ғанижонов, Миржаҳон Мираҳмадов, Ислом Кенжабоев, Абдуқодир Ортиқов, Турсунбой Раҳимбердиев, Усмонали Усмоналиев, Жасур Яхшибоев, Билол Тошмирзаев, Сухроб Нуриллоев.
Изоҳ (0)