2 апрель, шанба куни Испания чемпионати 31-турида Мадриднинг «Реал» жамоаси сафарда «Барселона» клубига қарши баҳс олиб боради. «Sports.uz» интернет-нашри навбатдаги «Эль-Класико» олдидан жамоаларнинг ўзаро тўқнашувларини кузатиб, пенальтилардан урилган голларни ҳисоблаб чиқди.
Испания чемпионатидаги «Эль-Класико»ларда мухлислар 11 метрлик жарима зарбаларидан киритилган 37 та голга гувоҳ бўлган. Ана шу голларнинг 23 тасини «Реал», 14 тасини эса «Барселона» футболчилари киритган.
Қуйида «Эль-Класико»да киритилган пенальтилар ҳақида қизиқарли фактлар келтирилган.
- Пенальтидан урилган голларнинг 21 таси «Сантьяго Бернабеу»да, қолган 16 таси эса «Камп Ноу»да киритилган;
- «Реал» пенальтидан гол урган ўйинларнинг 12 тасида ғалаба қозониб, 7 тасида дуранг ўйнаган бўлса, 4 тасида имкониятни бой берган;
- «Барселона» пенальтидан гол урган ўйинларида 6 ғалаба, 3 дуранг ва 4 мағлубиятни қайд этган;
- «Эль-Класико»ларда жами 20 нафар футболчи пенальтилардан гол урган: «Реал»дан 12, «Барселона»дан 8 футболчи;
- Энг кўп пенальтидан гол урган футболчи – Уго Санчес («Реал») – 5 та;
- «Реал» сафида пенальтидан гол урган футболчилар: Уго Санчес (5 та), Криштиану Роналду (3), Ференц Пушкаш (2), Франсиско Хенто (2), Хуанито Гомес (2), Мичель (2), Руд ван Нистелрой (2), Луис Регейро (1), Корона (1), Альфредо Ди Стефано (1), Пирри (1), Ули Штилике (1);
- «Барселона» таркибида пенальтидан гол урган футболчилар: Лионель Месси (3), Рональд Куман (3), Кини (2), Роналдиньо (2), Карлес Решак (1), Роберто (1), Бернд Шустер (1), Гильермо Амор (1);
- Биринчи таймларда пенальтилардан 17 та, иккинчи бўлимларда эса 20 та гол киритилган;
- «Реал»нинг пенальтидан урган голларининг 12 таси биринчи таймда, 11 таси иккинчи бўлимда киритилган;
- «Барселона»нинг пенальтилардан урган голларининг 5 таси биринчи бўлимда, 9 таси эса иккинчи таймда урилган;
- Энг кўп пенальти 2014 йилда тепилган. Уларнинг сони 4 та. Ўшанда Роналду ва Месси 2 тадан гол урган эди.
2 апрель, шанба куни бўлиб ўтадиган навбатдаги «Эль-Класико»ни Алехандро Хосе Эрнандес Эрнандес бошчилигидаги ҳакамлар гуруҳи бошқариб боради. Учрашув Тошкент вақти билан 23:30 да бошланади.
Эслатиб ўтамиз, биринчи даврада «Барселона» жамоаси «Сантьяго Бернабеу» стадионида «Реал»ни 4:0 ҳисобида мағлубиятга учратган эди.
Изоҳ (0)