Ердаги сув шу пайтгача тахмин қилинганидек, комета ёки астероидлар томонидан олиб келинмаган, балки, аввалдан мавжуд бўлган. Бу ҳақда Science журналида чоп этилган мақолага таяниб, «РИА Новости» хабар бермоқда. Олимлар Арктикадаги Канада оролида Ернинг энг қадимий жинсларини ўрганиб, шундай хулосага келди.
«Ушбу жинслар намуналаридаги сув молекулалари таркибида дейтерий (оғир водород) атоми кам миқдорда аниқланди. Бу шуни билдирадики, у Ерга шаклланиб, совигандан сўнг эмас, балки сайёранинг чанги билан бирга тушган. Ушбу чангдаги сувнинг катта қисми буғланиб кетган, бироқ унинг қолдиқлари Ерда океанларни юзага келтириш учун етарли бўлган», — деди олимлардан бири Лидия Халлис.
Бугунги кунда сайёрашунослар Ердаги сувлар «космик» тарихга эга деб ҳисоблайди. Уларнинг ярми фикрича, сув манбаи кометалардир, қолган астрономлар эса Ер сайёрасининг сув захираси астероидлар томонидан келтирилган деб ҳисоблайди.
Халлис ва унинг ҳамкасблари Канаданинг Баффина ўлкасида 1985 йилда топилган қадимий жинслар намуналарини ўрганиб, аслида сайёрадаги океанлар унинг ўз суви билан тўлдирилганини кўрсатиб берди.
Ушбу бўлаклар таркибида инклюзия — қийин эрийдиган кристаллдан иборат кичик шарчалар бўлиб, улар 4,5 — 4,4 миллиард йил аввал Қуёш тизими янги пайдо бўлган вақтда шаклланган. Улар Ер қаърини ҳеч қачон тарк этмагани ва Ер қобиғидаги бошқа жинслар билан қоришиб кетмагани туфайли, уларнинг таркибида сайёранинг дастлабки материяси мавжуд.
Изоҳ (0)