Rolls-Royce компанияси Dawn номини олган тўрт ўринли кабриолетни расман намойиш этди. Янги модель савдоси 2016 йилда бошланиши кутилмоқда, дея хабар бермоқда «Carzone.uz».
Dawn белгисидан Rolls-Royce компанияси илк бор 1950—1954 йиллар давомида атиги 28 дона ишлаб чиқарилган классик Silver Dawn кабриолетида фойдаланган эди.
Британияликларнинг маълум қилишича, модель «Wraith купеси негизида қурилган эмас» ва тўлиқ мустақил, чунки унинг кузовидаги панелларнинг 80 фоизи уникалдир.
Кабриолет соатига 50 километр тезликда 22 сонияда «мутлақо шовқинсиз» механизм ёрдамида йиғиладиган ёки ўрнатиладиган юмшоқ томга эга бўлган.
Rolls-Royce Dawn автомобили 16 та индивидуал равишда созланган динамикали, янги Bespoke стереотизими билан таъминланган. Махсус микрофон салондаги ташқи шовқинларни назорат қилиб туради, шундан сўнг тизим тоналлик ва мусиқа баландлиги даражасини мустақил равишда белгилайди.
Кабриолет бошқарувини сенсор сатҳдаги махсус контроллёр ёрдамида амалга ошириш мумкин бўлган мультимедиа мажмуаси билан таъминланган бўлиб, хусусан, унда маълумотларни бармоқ ёрдамида киритиш тизими ҳам мавжуд — мазкур тизим лотин, араб ва хитой имлосини танийди.
Rolls-Royce Dawn фаол иқлим назорати (круиз-контрол), асосий чироқнинг мослашувчан фаралари ва маълумотлари салондаги 10,25 дюймли мониторда кўрсатиб туриладиган сунъий йўлдош навигация тизими билан ҳам таъминланган. Бундан ташқари, моделда проексион дисплей ва тепловизор асосида пиёдалар ва жониворларни таниш тизими ҳам бор.
Янги модель ҳажми 6,6 литр бўлган 563 от кучига эга бензинли В12 турбомотор билан таъминланган. Двигатель ZF компаниясининг саккиз босқичли автомат узатмалар қутиси билан бошқарилади. Кабриолетда узатмалар қутиси ишини GPS-навигатор маълумотлари билан мувофиқлаштирувчи Satellite Aided Transmission (SAT) тизими қўлланилган.
Rolls-Royce Dawn айнан қачон савдога чиқиши, нархлари қандай бўлиши ҳақида ҳозирча ахборот берилмаяпти. Тахминларга кўра, кабриолет камида 250 минг фунт-стерлинг (380 минг доллар)дан сотилади.
Изоҳ (0)