Opel ва Chevrolet Россия бозорини General Motors автоконцерни тахмин қилганидек йил охирида эмас, балки октябрдаёқ тарк этиши мумкин. Бу ҳақда «RBK» хабар бермоқда.
Дилерларнинг захиралари ойлик савдо кўрсаткичларидан камлиги, ишлаб чиқарувчининг омборхоналарида эса машиналар деярли қолмагани сабаб, Opel ва Chevrolet Россия автомобиль бозорини кутилганидан аввал тарк этадиган бўлиб турибди.
Манбаларнинг маълум қилишича, Москва ва Санкт-Петербургдаги автосалонлар барча харидоргир моделлар, хусусан, Chevrolet Cruze ва Aveo, шунингдек, Opel Mokka ва Astra бўйича ўткир тақчилликни бошдан кечирмоқда.
«Автомир» компаниясининг тижорат ишлари бўйича директори Виталий Грошенковнинг маълум қилишича, машина сотувчилар Opel ва Chevrolet’нинг савдолари йил охирига қадар давом этади, деб кутганди.
«Дилерларнинг бир қисми бўш қолган майдонларни тўлдириш учун бошқа маркалар билан келишиб бўлди, бошқалар эса ўз марказлари фаолият йўналишини ўзгартиришга, масалан, супермаркетга айлантиришга ҳаракат қилмоқда, яна қайсидир автосалонлар эса шунчаки ёпилмоқда», — деди Грошенков.
Изоҳ (0)