2015 йил 10 сентябрь куни Ўзбекистон Миллий кутубхонасида математик олим, Ўзбекистонда хизмат кўрсатган фан арбоби, Ўзбекистон ФА асосчилари ва кейинчалик Президентларидан бири, физика-математика фанлари доктори, фан ва таълим фидоийси, жамоат арбоби, 170 дан зиёд илмий рисолалар, 8 та монография ва 2 та дарслик, шунингдек, кўпгина илмий мақолалар муаллифи — Ўзбекистон ФА академиги Тошмуҳаммад Алиевич Саримсоқов таваллудининг 100 йиллигига бағишланган «Математиканинг бетакрор оламида» адабиётлар кўргазмаси очилди. Бу ҳақда кутубхона расмий сайти хабар бермоқда.
Кўргазмада Саримсоқовнинг ҳаёт йўли билан таништирувчи китоблар, илмий рисолалар, хотиралар ўрин олган. Т.А.Саримсоқов 1915 йилда Андижон вилояти Шаҳрихон қишлоғида таваллуд топган. 1936 йилда Ўрта Осиё Давлат университети физика-математика факультетини муваффақиятли тамомлаб, аспирантурага киради. Докторлик мақомини олиб ва ҳарбий хизматни ўтагач, 1942 йилдан бошлаб Саримсоқов университетда ўз педагогик ва ташкилотчилик маҳоратини намойиш этиб, талабаларга дарс бериб, умумий математика, эҳтимоллар назарияси ва математик статистика кафедраларига мудирлик қилди, университет ректори лавозимида меҳнат қилди. У илмий кадрларни тайёрлашга алоҳида эътибор қаратди ва 40 нафар фан номзодини етиштирди. Т.А.Саримсоқов Ўзбекистон олий таълими тараққиётига беқиёс ҳисса қўшган. У халқаро илмий ва сиёсий анжуманларда фаол иштирок этиб, дунёнинг 30 дан зиёд мамлакатларида ўзбек илм-фанини танитди. Фан тараққиётига қўшган ҳиссаси учун Т.А.Саримсоқов кўпгина Давлат мукофотларига сазовор бўлган, 2002 йилда эса фан ва таълим ривожига қўшган ҳиссаси муносиб баҳоланиб (вафотидан сўнг) «Буюк хизматлари учун» ордени билан тақдирланди.
Т.А.Саримсоқов томонидан ёзилган «Функционал анализ курси», «Ҳақиқий ўзгарувчининг функциялари назарияси» дарсликлари ҳозиргача олий ўқув юртларининг физика-математика, механика-математика ва амалий математика факультетлари талабалари учун беминнат рисола бўлиб келмоқда, унинг «Ўзбекистонда фан тараққиёти» ва «Ҳаёт довонлари» китоблари эса кўргазмага ташриф буюрганларга ўзбек илм-фаниниг шаклланиши ва унинг фидоий намоёндалари ҳақида ҳикоя қилади.
Изоҳ (0)