Австралиянинг Мелбурн шаҳрида таэквондо-WTF бўйича мусобақа давом этмоқда. Stadion.uz’нинг хабар беришича, Рио-2016 Олимпиадаси йўлланмалари учун рейтинг очколари ўйналаётган мусобақада ўзбекистонлик уч спортчи иштирок этмоқда.
Мусобақанинг илк куни даянга чиққан жаҳон чемпиони Дмитрий Шокин барча рақибларини мағлубиятга учратиб олтин медал ва 20 рейтинг очкосини қўлга киритган эди.
Яна бир ўзбекистонлик спортчи, жаҳон вице-чемпиони, дунё рейтингида 1-ўринни эгаллаб турган Жасур Бойқўзиев 87 килограммгача бўлган вазн тоифасида кумуш медалга сазовор бўлди. Жасур ҳал қилувчи финал баҳсида хитойлик Жао Ёнгга имкониятни бой берди.
Ўзбекистон терма жамоасининг учинчи аъзоси – Умида Абдуллаева эса илк баҳсдаёқ рақибасига ютқазиб қўйди.
Маълумот ўрнида шуни айтиш керак, ўтган йилги мусобақада Никита Рафалович ғолиблик шоҳсупасига кўтарилган эди, Дмитрий Шокин кумуш, Жасур Бойқўзиев эса бронза медалига сазовор бўлганди.
Изоҳ (0)