Лавозимини тарк этишини эълон қилган ФИФА президенти Йозеф Блаттер ҳали истеъфога чиқмаганини, бор-йўғи ўз келажагини ташкилот конгрессига ишониб топширганини маълум қилди. Бу ҳақда «ТАСС» хабар бермоқда.
Блаттер ФИФАнинг 29 май куни бўлиб ўтган конгрессида навбатдаги муддатга ташкилот президенти этиб сайланган эди, бироқ сайлов арафасида юз берган коррупция можароси сабаб, сайланганидан тўрт кун ўтиб истеъфога чиқишини эълон қилганди.
Амалдор ФИФА музейининг очилишида журналистларнинг нафақага чиқиш ҳақидаги саволига жавоб бераркан, жумладан шундай деди: «Мен истеъфога чиққаним йўқ, бор-йўғи ўз келажагимни ФИФАнинг навбатдан ташқари конгрессига ишониб топширдим».
Эслатиб ўтамиз, ФИФАнинг янги президенти сайлови бўладиган кунни белгилайдиган ташкилот ижроқўмининг навбатдан ташқари мажлиси 20 июль куни Цюрихда бўлиб ўтади.
Сайловгача эса 1998 йилдан бери ФИФАга раҳбарлик қилиб келаётган Блаттер президент вазифасини бажариб туради.
Изоҳ (0)