Тожикистон Хитойда ўлимга ҳукм қилинган ўз фуқароларини қайтаради
Тожикистон Хитойда ўлим жазосига ҳукм этилган ўз фуқароларини ватанга қайтаради. Бу ҳақда Тожикистон бош прокурори Юсуф Раҳмон маълум қилди, дея хабар бермоқда «Азия-Плюс».
Унинг сўзларига кўра, ҳозирги вақтда Хитойда 16 нафар тожикистонлик жазони ўтамоқда, тўрт нафар тожикистонлик эса Хитой суди томонидан ўлим жазосига ҳукм қилинган.
Тожикистон ва Хитой ўртасида судланувчиларни топшириш тўғрисидаги битим ратификация қилингани муносабати билан, Хитойда судланган барча тожикистонлик қариндошлари ҳисобидан Тожикистонга қайтарилади ва жазони Тожикистонда ўтайди.
Айни вақтда, Тожикистон қамоқхоналарида уч нафар Хитой фуқароси жазони ўтамоқда – улар ноқонуний наркотик айланмаси, зўрлаш ва фирибгарлик жиноятларида айбланиб, озодликдан маҳрум этилган.
Тожикистон бош прокурорининг қўшимча қилишича, ҳозирги вақтда 7,7 мингдан ортиқ тожикистонлик Россия қамоқхоналарида жазони ўтамоқда. Душанбе ва Москва ўртасида судланувчиларни топшириш тўғрисида битим бўлишига қарамай, Тожикистон Россияда судланган барча фуқароларини ватанга қайтариш имконига эга эмас.
