Маст ҳолда машина ҳайдаб ўзбекистонлик ишчининг ўлимига сабаб бўлган россиялик депутат уч йилга қамалди

Москванинг Пресня тумани суди Тамбов вилояти думаси депутати Владимир Топорковни ўзи содир этган йўл-транспорт ҳодисасида ўзбекистонлик ишчининг ўлимига сабаб бўлгани учун уч йиллик манзил-колония жазосига маҳкум қилинди, деб хабар бермоқда «РИА Новости».

Топорков маст ҳолатдаги шахс томонидан йўл ҳаракати қоидаларининг бузилиши оқибатида эҳтиётсизлик туфайли одам ўлишига сабаб бўлиш жиноятини содир этганликда айбланган. Судланувчи ўша куни маст ҳолда автомобиль бошқарганини тан олган, бироқ ишчи унинг айби билан ҳалок бўлганини рад этган.

Қайд этилишича, Тамбов думасининг «Единая Россия» партиясидан депутати Топорков 2014 йил 10 август тунда Москванинг Смоленск майдонида КамАЗ русумли юк машинасига бориб урилган. Тўқнашув натижасида ўзбекистонлик йўл ишчиси воқеа жойида ҳалок бўлган.