Ўзбекистонлик ҳакам Равшан Эрматов, букмекерлик идоралари томонидан ЖЧ — 2014 финалини бошқариш учун энг асосий номзод сифатида қаралмоқда, дея хабар беради Stadion.uz Bookmakers Rating нашрига таяниб.

Манбанинг маълум қилишича, финални бошқаришга бош даъвогар айнан Эрматов бўлиб қолмоқда. Машҳур букмекерлик идораларидан бири Betfair Эрматов финални бошқаришини 2.54 коэффициентда ставкалаган.

Жаҳон чемпионатлари тарихида тўққизта учрашув бошқариб рекорд ўрнатган Эрматовдан кейинги номзод сифатида кўрсатилган португалиялик Педру Проэнсанинг финални бошқариш имкониятини букмекерлар 5.94 коэффициентда баҳолаган. Шунингдек, швециялик Юнас Эрикссон, америкалик Марк Гейгер ёки Никола Рицсолиларнинг финалда ишлаш имконияти 6.89 коэффициентида тенглаштирилган.

Эслатиб ўтамиз, Эрматов ҳозирча Бразилияда бўлиб ўтаётган жаҳон чемпионатининг тўртта учрашувини ҳакамлик қилди ва жами жаҳон чемпионатларида ишлаган ўйинлари сони 9 тага етди.

ЖЧ — 2014 финал учрашуви Тошкент вақти билан 13 июлдан 14 июлга ўтар кечаси 00:00 да бошланади.