Ҳиндистон шимолидаги темирйўл ҳалокати қурбонлари сони 23 нафарга етди

Ҳиндистон шимолида 26 май, душанба куни йўловчи ва юк поезди тўқнашуви натижасида ҳалок бўлганлар сони 23 нафарга етди, дея хабар бермоқда BBC News.

Қутқарувчилар 27 май, сешанба куни ағдарилиб кетган вагонларнинг охиргисини кўздан кечириб, ҳалок бўлганлар ва жароҳатланганларни олиб чиққан.

«Кун»нинг маълум қилишича, жароҳатланганларнинг 52 нафари аҳволи оғир бўлиб, шу сабабдан, ҳукумат вакиллари ҳалок бўлганлар сони яна камида 15 нафарга кўпайишидан хавотирда.

Ҳиндистоннинг янги тайинланган бош вазири Нарендра Моди ҳалок бўлганлар ҳар бирининг оиласига 200 минг рупий (тахминан 3,4 минг доллар ёки 2 минг фунт-стерлинг) миқдорида товон пули берилишини маълум қилган.

Ҳиндистон темирйўл тармоғида кунига 9 минг поезд 18 миллионга яқин йўловчини ўз манзилига етказиб қўяди. Бироқ сўнгги йилларда кузатилган темирйўл ҳалокатлари натижасида юзлаб одамлар ҳалок бўлди.

Хусусан, 2013 йил декабрида жанубдаги Андҳра-Прадеш штатида поезднинг ёниб кетиши натижасида 26 киши ҳалок бўлган, август ойида эса Биҳар штатида ҳаракатланаётган поезд ҳалокати натижасида 28 киши вафот этган эди.