Qashqadaryo viloyatida yakshanba kuni rahbariyati topshirig‘iga ko‘ra ishga jalb qilinib, tok urishi oqibatida vafot etgan xodimning oilasiga moddiy va ma’naviy zarar undirib berildi. Bu haqda viloyat Kambag‘allikni qisqartirish va bandlik boshqarmasi axborot xizmati xabar berdi.
“Daryo”da Qarshi tumanida yashovchi 36 yoshli marhum Bobur Sheraliyevning yakshanba kuni ishga chaqirilib, uyiga o‘lik holda qaytgani haqida maqola e’lon qilingandi.
Uch farzandning otasi bo‘lgan Bobur Sheraliyev o‘limiga qadar 12 yil davomida Qarshi shahar Obodonlashtirish boshqarmasida ishlab kelgan. U 2023-yilning 18-iyun, yakshanba kuni ishga chaqirilgan.
“Shoira degan opa bor. U har kuni ertalab 05:30 larda telefon qilardi. O‘sha kuni ham telefon qilib, Bobur kel deb telefon qildi. Keyin chiqib ketdi. Aslida shanba, yakshanba dam kuni, ammo dam yo‘q edi”, — degandi marhumning xotini Zubayda Inoyatova.
Qashqadaryo viloyat Kambag‘allikni qisqartirish va bandlik boshqarmasi axborot xizmati e’lon qilgan videoda aytilishicha, sud marhumning oilasiga 167 million so‘m moddiy va ma’naviy zararni undirib bergan.
Shuningdek, uch nafar farzandim uchun har oy nafaqa puli to‘lab berilmoqda, — deydi marhumning bevasi Zubayda Inoyatova.
Izoh (0)